________________
४६
सिरिभुयणसुंदरीकहा ॥ ता सोवि असहमाणो अम्ह बलं सयलनियबलसमेओ । कंचिनयरीओ तुरियं विसमयरं दुग्गमणुसरिओ ॥४८७।। तत्थेव द्रविडविसयंतवासि-अइविसममलयगिरिनियडं । । नामेण अलंघपुरं मणोरहाणं पि हु अगम्मं ॥४८८।। चउदिसि बारसजोयण-निज्जलमइनिबिडविडविघणगुम्मं । गुम्मततिक्खकंटयपरंपरानिहयसंचारं ॥४८९।। जइ खंडिज्जइ पल्लवमेत्तं पि हु तस्स बाहिरवणस्स । ता वाणवंतरो कोवि देव ! पीडेइ तुह सेन्नं ॥४९०।। न विणय-पणाम-पूया-धूय-क्खय-कुसुम-गंध-दीवेहिं । उवयरिओ वि हु तूसइ जम्मंतरवेरिओव्व सुरो ॥४९१।। ता देव ! वाणमंतरबलेण वणदुग्गगुरुबलेणं च । बहुभंडारपरिग्गहबलेण सव्वेण सो बलिओ ।।४९२।। देवाणुहावओ सव्व वत्थु-संपत्तिसुत्थिओ सययं । जं जं हियए चिंतइ तं तं सव्वं पि संपडइ ॥४९३।। अम्हं न बुद्धि-पोरिस-विसेसववसायगोयरो देव ! । न य सामाइचउव्विहनीई वि हु तत्थ मे फुरइ ।।४९४।। ता सो महाबलो नाम खत्तिओ सुरबलेण बलवंतो । तप्पडियारो तुरियं कायव्वो केणइ नएण" ।।४९५।। इय सव्वं लेहत्थं सोऊणं राइणा तओ पवणो । सम्माणिऊण बहुयं आवासं पेसिओ य गओ ।।४९६।। सहसत्ति तओ दिट्ठी नराहिवइणो महोयहिम्मि गया । तेणावि निवो भणिओ अइगरुयं देव ! तं कज्जं ॥४९७।।
Jain Education International
For Private & Personal Use Only
www.jainelibrary.org
