________________
सिरिभुयणसुंदरीकहा ॥
४७३ पुण पूइऊण विहिणा फासुयदाणेण समणसंघं च । सम्माणिऊण सव्वं पणइयणं सयणवग्गं च ।।५१८१॥ कयकायव्वविसेसा पसत्थतिहि-करण-वार-रिक्खंमि । महया विच्छड्डेणं समागया गुरुसमीवंमि ॥५१८२।। गुरुणा वि सुत्तवन्नियविहिणा संसुज्झमाणपरिणामा । पव्वाविया कमेणं नियनियपरिवारपरियरिया ॥५१८३।। अब्भसियसाहुकिरिया दुवालसंगाण नायपरमत्था । दुक्करतव-चरणरया चिट्ठामो गुरुसमीवंमि ।।५१८४।। तो जायपरमवेरग्गवासणा नियसरीरनिरवेक्खा । गुरुणा समणुनाया एग्ग(ग)ल्लविहारिणो जाया ।।५१८५।। ता एवं मह सावय ! जायं वेरग्गकारणं तेण । संजायभवविराओ चरेमि घोरं तवच्चरणं' ।।५१८६।। तो भणइ वीरसेणो ‘भयवं ! वेरग्गकारणं तुज्झ । अइसुंदरं महायस ! संजायं भवविरायकरं ।।५१८७।। निसुणंताण वि एयं नराण संवेयकारयं चरियं । किं पुण समयविहूयं न तुम्ह सुविसुद्धचित्ताण ? ||५१८८।। धन्नो सि जेण तुमए नेहासंगेण निच्चपजलंतो । अहकलुसकज्जलफलो चत्तो दीवो व्व घरवासो' ॥५१८९।। एत्थंतरंमि सहसा विन्नत्तो देव ! अह मए वीरो । 'तुरियं पत्थुयकज्जे सुसावहाणो हवउ देवो' ।।५१९०॥ तो भणइ वीरसेणो ‘पढमं जिणवंदणेण पुण तुम्ह । पयंकमलदसणेणं पहीणपाओ(वो) अहं जाओ ।।५१९१॥
Jain Education International
For Private & Personal Use Only
www.jainelibrary.org
