________________
४७४
सिरिभुयणसुंदरीकहा ॥ तुह अच्चब्भुयसच्चरियसवणसंजायसुद्धपरिणामो । पयडविवेयपईवो तुह पयसेवाए(इ) जाओ हं ।।५१९२।। इय भणिऊण नरिंदो पंचंगं पणमिऊण मुणिचंदं । सहिओ मए सवेगं उज्जाणवणाओ नीहरिओ ।।५१९३॥ अह जिणपूया-वंदणपडिहयविज्जोवघाइपावंसा । सुविसुद्धसाहुसेवाविढत्तबहुपुन्नपब्भारा ||५१९४।। सिरिवीरसेणअसरिसपहावसंजायविज्जसामत्था । दो वि समं चिय गयणे उप्पइया सुरकुमार व्व ।।५१९५।। पत्ता खणेण चंपं ओयरिया वासपुज्जजिणभुयणे । कयजिणपूया सम्म थुणामु परमाइ भत्तीए ||५१९६।। एत्थंतरंमि सूरो संझारुणकिरणकंतिकब्बुरिओ । पुव्वदिसावहुकुंकुमरसरइओ भालतिलओ व्व ॥५१९७।। आलोयसुहं पढमं संजायं तयणु दरदुरालोयं । तं चेव भाणुबिंबं खणेण जायं सुदुव्विसहं ।।५१९८।। जह जह कमेण गयणं आरुहइ रवी तहा तहा अहियं । पावइ पयाववुढ़ि(ड्डि) असेसतेयंसिहयपसरं ।।५१९९।। एवंविहमि समए नरसीहो विहियगोसकरणीओ । सेवयसयसंकिन्नो अत्थाणे तयणु उवविसइ ॥५२००।। तो विमलमईपमुहा उज्जलयरवेससोहियसरीरा । पविसंति पसन्नमणा सुमंतिणो तह अमच्चा य ।।५२०१।। एत्थंतरंमि भणिओ पडिहारो राइणा 'अरे ! तुरियं । हक्कारसु जोइसियं पुच्छामि पयाणसुहलग्गं' ||५२०२।।
Jain Education International
For Private & Personal Use Only
www.jainelibrary.org
