________________
४६६
सिरिभुयणसुंदरीकहा ॥ इय भयतरलियहियओ सकीयदुच्चरियजायअणुतावो । नमिऊण सायरमहं मुणिनाहं भणिउमाढत्तो ॥५१०४।। 'भयवं ! जं जह वित्तं पच्चक्खं तं तहा असेसं पि । पयडतेण फुडत्थं छिनो मह संसओ सव्वो ||५१०५।। पढमं पियामहाणं सरूवमच्चुज्जलम्मि जिणधम्मे । दूसग-अदूसगाणं दोस-गुणुब्भावणं कहियं ॥५१०६।। तयणंतरं च नारीसरूवकहणेण अणुभवपसिद्धो । मह तिव्वयरो जणिओ विसयविराओ तए नाह ! ॥५१०७॥ संसारसुहाणं किर मूलं एयाओ होति जुयईओ । एयाण कए सयलं जयं पि इह दुत्थियं होइ ।।५१०८।। ताणं च पुण सरूवं चिंतिज्जंतं पि किर विवेईण । भीमं भयमुप्पायइ पच्चक्खं जं मए दिलृ ।।५१०९।। परजुयइपसत्ताणं तव्विरत्ताण होंति दोस-गुणा । ते तक्कर-सागरदत्तपयडदिटुंतओ भणिया ॥५११०॥ मिच्छत्तमोहियाओ मरंति नियभत्तुणा समं जाओ । तं ताण निप्फलं चिय मरणं पयडीकयं तुमए ॥५१११॥ सव्वे भिन्ना जीवा परोप्परं भिन्नकम्मसंजोया । कह ते समं मरंता वि संगम एत्थ पावंति ? ||५११२।। तह वेउत्तो धम्मो अणुट्ठिओ तेण मज्झ वयणेण । मरिऊण जहा जाओ सगिहे कोलुदुरत्तेण ।।५११३।। उवमाठाणं लोए मह माउ-पिऊण आसि जो नेहो । ताई चिय अन्नोन्नं तिरियत्तभवंमि भक्खंति ।।५११४।।
Jain Education International
For Private & Personal Use Only
www.jainelibrary.org
