________________
सिरिभुयणसुंदरीकहा ॥
पर(रि)णीयपइं अणुरत्तमाणसं दिन्नविहववित्थारं । परिहरइ विरत्तमणा अन्नस्स कए महिड्डिस्स ॥५०७१।। तं पि महारिद्धिल्लं परिचयइ अणाहरंकरेसंमि । तह वि एवंविहाण मूढा रज्जंति नारीण ॥५०७२।। भावंति न परमत्थं खणसुहकज्जेण नवर मुझंति । रागंधा कावुरिसा पेच्छंति न आयइं मूढा ॥५०७३।। न गणंति गुरुवएसं जहत्थमवि पवयणं पसंति । एमेव गयनिमीलं काऊण तहेव सीयंति ।।५०७४।। तो ते असमत्था इव सत्ताऽवटुंभवज्जिया दीणा । सीह व्व मोहपंजरमज्झगया तह विसूरंति ।।५०७५।। दुक्कज्जायरणसमज्जिएण तो ते सयंकएणेव । पावेण महानरए निवडंति अणंतदुक्खंमि ।।५०७६।। कह तुच्छसोक्खकंखाए जाणमाणेहिं इममकज्जं ति । अप्पा दुहमि खिप्पइ बहुसागरसंखदुत्तारे' ॥५०७७।। इय मुणिवयणं सोउं समहियसंसारजायवेरग्गा । जा चिंतेमो तत्तं ता सहसा आगओ चोरो ॥५०७८।। मुणिणो पयाहिणतिगं काऊणं भवविरत्तचित्तो य । पाएसु पडइ निब्भरभत्तिवसुव्बूढरोमंचो ॥५०७९।। 'जय अन्नाणदिवायर ! जय जय निम्महियमोहतिमिरोह ! । जय सव्वसत्तपयडियसंसारसरूववित्थार !' ॥५०८०।। इय थुणिऊण मुणिंदं उवविठ्ठो अम्ह नाइदूरम्मि । सिरविरइयंजलिवुडो सो चोरो भणिउमाढत्तो ॥५०८१।।
Jain Education International
For Private & Personal Use Only
www.jainelibrary.org
