________________
४६२
सिरिभुयणसुंदरीकहा ॥ पुव्वभवब्भासेणं तुहाणुरत्ता नरिंद ! एसा वि । - पुव्वभवदेवरे च्चिय तहेव चोरे वि अणुलग्गा ||५०६०॥ जुवईउ नाम सावय ! निरुवायाओ विसस्स गंठीओं । मयणानलुब्भवाओ जालाओ व दडलोयाओ ।।५०६१।। नरयदुवारुग्घाडणकुंचियकुडिलाओ सग्गनयरंमि । पविसंताण निरंभणभुयग्गलाओ व्व जीवाणं ॥५०६२।। संपुन्नधम्मससहरकिण्हतिहीओ व्व खयनिमित्ताओ । विविहवसणंकुराणं पादुब्भवकंदलीओ व्व ॥५०६३।। जणनयणमोहणीओ भुयणस्स वि जणियतिव्वतण्हाओ । परमत्थदुहफलाओ इमाओ माइण्हियाउ व्व ।।५०६४।। अणुरत्ताओ दूरं दीसंति नराण जणियहरिसाओ । जा सुयणमालियाओ व दरवलियाओ विरज्जंति ।।५०६५।। बहुकूडकवड-माया-पवंच-परवंचणाइदोसाण । एयाओ चिय पायं निवासभूमीओ जुवइ(ई)ओ ॥५०६६।। एयासु जे अणुलग्गा नावासु व च्छिन्नसव्वबंधासु । बुडंति ते अणाहा संसारमहासमुदंमि ॥५०६७।। वीसमह वरं भीसणभुयंगप्फारप्फणाण छायासु । न उणो दवग्गिदीवयस(सा?)हासु व दुट्ठजुयईसु ।।५०६८॥ कह ताण जीवियासा नराण नारीपसत्तचित्ताण । जा जणणि-जणयदिन्नं परिणीयपई पि मारेइ ? ।।५०६९।। तं किं पि महासाहसमचिंतणीयं कुणंति एयाओ । जं गरुयसाहसा वि हु भएण कंपति चिंतंता ॥५०७०।।
Jain Education International
For Private & Personal Use Only
www.jainelibrary.org
