________________
४५७
- सिरिभुयणसुंदरीकहा ॥
सो राया तीए समं भुजंतो अणुवमे परमभोए । देवो व देवलोए गयं पि कालं न याणेइ ॥५००५।। तस्सासि परमपुज्जो पुरोहिओ नाम विण्हुमित्तो त्ति । सयलेसु वि कज्जेसुं पमाणभूओ नरिंदस्स ।।५००६।। तस्स कणिट्ठो भाया नामेणं अस्थि अग्गिमित्तो त्ति । लावन्न-रूव-जोव्वण-सोहग्गगुणाण आवासो ।।५००७।। जयदेवी-नामेणं परिणीया तेण विण्हुमित्तेण । बीएण वसंतसिरी परिणीया अग्गिमित्तेण ॥५००८।। ते दो वि वेयवन्नियधम्माणुट्ठाणसेवणानिरया । अच्छंति जहासोक्खं महिंदसीहस्स गुरवो व्व ॥५००९।। भणिओ य विण्हुमित्तो नरवइणा अन्नया दिणे एवं । 'मह पासं न खणं पि हु मोत्तव्वं एस तुह नियमो ॥५०१०॥ मेहाण व उट्ठाणं अतक्कियं होइ रज्जकज्जाण । ता इय तुह विवरोक्खे केण समं संपहारेम्हि ? ॥५०११।। एसो च्चिय तुह भाया मह गेहे कुणसु संतियम्माई । अंतउरे वि एसो निव्वत्तउ सव्वकज्जाई' ॥५०१२।। तो ‘एवं' ति पणिउं निरूविओ तेण अग्गिमित्तो सो । निययपुरोहियठाणे मंतिपए अप्पणा जाओ ॥५०१३।। एवं च विण्हुमित्तो मंती नीसेसमंतिवग्गस्स । नियबुद्धिपहावेणं विहिओ सो राइणा जेट्ठो ॥५०१४।। इयरो वि अग्गिमित्तो पुरोहियाणं च जाइं कज्जाइं । ताई कुणंतो अच्छइ नरिंदअंतेउरगिहेसु ।।५०१५।।
Jain Education International
For Private & Personal Use Only
www.jainelibrary.org
