________________
४४८
सिरिभुयणसुंदरीकहा ॥ अह कहवि परियडंतो रइकेली तं समागओ गहणं । निसुणइ ताणन्नोन्नं संचल्लं कीलमाणाण ॥४९०६।। अन्नायपयपयारो पासं गंतूण ताण जा नियइ । ता सो पेच्छइ चोरं कंतिमईरइसुहक्खणियं ।।४९०७।। तो जायनिच्छओ सो तुरियं गंतूण कहइ रायस्स । राया असद्दहतो ताण समीवं सयं एइ ॥४९०८।। तं तह चेय नियच्छइ चोरं सह तीए दुटुनारीए । सो भणइ ‘सच्चमेयं रइकेलि ! पयंपियं तुमए ॥४९०९।। 'ता निहुयं निसुणामो अन्नोन्नमिमेसि पत्थुयालावे । पच्छा जं कालोचियमिह होही तं करिस्सामि' ॥४९१०॥
अह निव्वत्तियसंभोयसोक्खवीसंभजायपणयाए । ' पुट्ठो कंतिमईए चोरो 'कह एत्तियं दव्वं ?' ||४९११॥
तो तेण वि कहियमिणं ‘सागरदत्तस्स संतियं गहियं' । सा भणइ ‘साहु विहियं जं मुट्ठो दुट्ठवणिओ सो' ||४९१२।। 'किं किं ति?' भणइ चोरो कंतिमई भणइ सावओ सो खु । अच्चतरूव-लावन्नसंगओ सयलगुणजुत्तो ।।४९१३॥ तो तेण परमनेहाणुरायरत्ता वि इच्छिया नाऽहं । सेवडयवयणपरनारिसोक्खउवभोगभीएण ॥४९१४।। अवमाणिय म्हि जेणं पडिसेहंतेण मज्झ अहिलसियं । तस्स अवहरंतेण धणं उवयारो मह कओ तुमए' ||४९१५।। चोरो भणइ ‘किराडो केत्तियमेत्तो व्व सो मह वराओ । अन्नो वि हु जो गरुओ तुह सत्तू तं पि मह कहसु ॥४९१६।।
Jain Education International
For Private & Personal Use Only
www.jainelibrary.org
