________________
सिरिभुयणसुंदरीकहा ॥
सा भणइ कन्नमूले निहुयं ठाऊण 'तुज्झ जइ सत्ती । ता मह दइयं मारसु एवं चिय नरवई बीयं ॥४९१७।। तो हं तुह नीसंका जावज्जीवं भवामि पियभज्जा । एए दुवे वि सल्ले जइ कह वि तुमं समुद्धरसि ॥४९१८।। सेसाण पुणो सुंदर ! बीहामि न वणिय-बंभणाईण । परदारियाण तम्हा जइ सकसि ता इमं कुणसु' ।।४९१९।। चोरो भणइ 'नरिंदं उट्ठसु, दावेसु मज्झ, मारेमि । अन्नदिणे पुण तं चिय मारिस्सं बंभणं तुज्झ' ॥४९२०॥ सोऊण ताण वयणं रोसारुणलोयणो महाराओ । आभासइ रइकेलिं किं अज्ज वि इह विलंबेमि ? ||४९२१।। तो कड्ढिऊण राया करवालं धाइ तस्स चोरस्स । दूराओ हक्कंतो कक्कसवयणेहिं तज्जइ य ॥४९२२॥ 'रे पाव ! मओ एण्हि न होसि मारेमि निच्छियं अज्ज । जइ अत्थि का वि सत्ती ता तुरियं संमुहो ठासु ।।४९२३॥ परदव्वहरणदोसेण किं च परजुवइसंगदोसेण । रायविरुद्धासेवी वज्झो सि तुमं न संदेहो' ||४९२४।। चोरो भणइ 'निसामसु सम्म मह वयणमेग नरइंद ! । पच्छा तुह भुयदंडे रणकंडु फेडइस्सामि ।।४९२५।।
सयलजयनिंदणीया दोसा दो च्चे(व) इह जयपसिद्धा । .. जं परधणावहारो जं च परत्थीण परिभोगो ॥४९२६।।
सच्चमिणं चोरो हं निंदियकम्मेण मारणिजो(ज्जो) म्हि । परदारिओ उ नरवर ! तुह रज्जे होइ किं पुज्जो ? ||४९२७॥
Jain Education International
For Private & Personal Use Only
www.jainelibrary.org
