________________
सिरिभुयणसुंदरीकहा ॥
४४३ तो हं ससंकचित्तो सेज्झइमग्गेण नियघरस्सुवरि । आरूढो वासहरं कंतिमई नो निरिक्खेमि ॥४८५१।। अह अड्डरत्तसमए दिट्ठा गोहा गवक्खमारूढा । तिस्साणुमग्गओ सा धुत्ती पच्छा समारूढा ।।४८५२।। वलिऊण गया गोहा सा मह पासं समागया धिट्ठा । सेज्जाए मह निसन्ना पहिठ्ठवयणा इमं भणइ ।।४८५३।। 'पिययम ! दिलो तुमए गोरिदेवीए जो कओ मज्झ । अच्चभु(ब्भु)ओ पसाओ मह भत्तिवरोवरुद्धाए ।।४८५४।। तुह वयणेण ठियाहं भवणस्सुवरिं न जामि जा देविं । पच्चक्खमागयाए ता तीए अहं इमं भणिया ॥४८५५॥ 'किं न हले ! मह पासं समागया अज्ज ?' ता मए भणियं । 'नियभत्तुणा निसिद्धा चोराइभएण रयणीए' ||४८५६॥ गोरी भणइ ‘किमेवं बीहसि ? मह दिव्ववाहणारूढा | एज्जसु पइदियसं चिय नीसेसभयाइं चइऊण' ।।४८५७।। 'तो अज्जउत्त ! एयं गोहं नियवाहणं पसाएण । संपेसिऊण नीया तह चेय पुणो इहाणीया' ।।४८५८।। तो तव्वयणं सोउं साहस-धिद्वत्त-अलियवयणेहिं । ईसीसि कलुसियमणो सिढिलियनेहो अहं जाओ ॥४८५९।। ‘एवंविहाई जिस्सा अइविसमभयावहाई चरियाई । सा कह वि कुवियचित्ता मारइ मं नत्थि संदेहो' ।।४८६०।। एमाइ चिंतिऊणं हिययट्ठियरोसदूसियमणेण । हसिऊण केयवेणं मए अलक्खं व सा भणिया ।।४८६१ ।।
Jain Education International
For Private & Personal Use Only
www.jainelibrary.org
