________________
सिरिभुयणसुंदरीकहा ॥ इह अत्थि भरहवासे नयरी वाणारसि त्ति नामेण । नीसेसनयरगुणगणविहूसिया परमरम्मा य ॥४६३१॥ तत्थऽत्थि चंदगुत्तो त्ति नाम राया पवड्डियपयावो । नामेण चंदसेणा तस्सऽत्थि मणोहरा भज्जा ॥४६३२।। तस्सऽत्थि परमपुज्जो पुरोहिओ नाम चंडसम्मो त्ति । भज्जा से सोमसिरी ताण अहं संगमो पुत्तो ||४६३३।। परिचत्तबालभावो अणुवमसंपत्तजोव्वणो तत्थ । नीसेसकलाकुसलो जुवईण मणोहरो जाओ ।।४६३४।। परिणाविओ य पिउणा विमलमई नाम सुंदरं कन्नं । . तीए सह विसयसोक्खं भुंजतो तत्थ चिट्ठामि ।।४६३५।। नियकम्मपरिणईए किलिट्ठचित्तो अईव कूरप्पा । बहुपाणिघायणरओ संजाओ पयइनिकरुणो ॥४६३६॥ मारेमि अणंतेऽहं घरमूसय-मसय-मंकुणाईए । उंदुर-सप्पवहत्थं पोसेमि विराल-नउले वि ॥४६३७।। अह मज्झ पिया कालक्कमेण मरिऊण कम्मवसवत्ती । तत्थेव निए गेहे जाओ कोलुंदुरत्तेण ।।४६३८॥ भत्तारमणुसरंती पविसइ जलणंमि मज्झ जणणी वि । मरिउं नियगेहे च्चिय मज्जारित्तेण उववन्ना ।।४६३९॥ ताणं च उवरयाणं वेयविहाणेण विविहरूवाइं । उद्धदेहाइयाई मए वि विहियाई कम्माइं ॥४६४०।। तो उवरयंमि जएण(जणए) अहमेव पुरओहिओ(पुरोहिओ) परिद्वविओ। नरवइणा लोएण य पिउपडिवत्तीए(इ) दिट्ठो म्हि ॥४६४१॥
Jain Education International
For Private & Personal Use Only
www.jainelibrary.org
