________________
४२२
सिरिभुयणसुंदरीकहा ॥ तं भवकोडिदुलंभं जं नवरं जिणमयाणुगयं ॥४६१९।। तं तुडिवसेण लद्धं सम्मना(ना)णेण नायभवभावं । कम्मक्खए समत्थं तवोविहाणे निउंजामि ।।४६२०।। सचराचरे वि भुयणे नत्थि असझं तवस्स चित्तस्स । नियदेहनिरावेक्खो तेण तवं काउमारद्धो ।।४६२१॥ जं पुण भणियं तुमए 'भयवं ! वेरग्गकारणं गरुयं' । तं सावहाणहियओ आयन्नसु सावय ! कहेमि ।।४६२२।। इह जं जं चिय दीसइ रागनिमित्तं सरागपुरिसाण । तं तं चिय नीसेसं वेरग्गकरं विवेईण ।।४६२३।। जह नरयगया भावा चिंतिज्जंता जणंति उव्वेयं । तह दुक्खरूवयाए जाणसु संसारभावा वि ।।४६२४।। तय-मूल-पत्त-पल्लव-पुप्फ-फलाईणि निंबरुक्खस्स । विरसाइं तहा जाणसु संसारसुहाइं परिणामे ।।४६२५।। वस-मस-रुहिर-फोफस-तयट्टि-विड-मुत्त-अंतबीभच्छं । जह य सरीरमसारं तह जाणसु भवसरूवं पि ॥४६२६।। नियचित्तवियप्पेणं मुणंति जह सुंदरं मह सरीरं । संसारे सारत्तं तह होइ वियप्पसंजणियं ।।४६२७।। परमत्थसुहविहीणे नियमइपरियप्पणाकयसुहंमि । परमत्थपंडियाणं संसारे होइ निव्वेओ ।।४६२८।। सो जइ वि विविहनिव्वेयकरणकारणसहस्ससंकिन्नो । तह वि न मूढमईणं निव्वेयं जणइ अनिमित्तो ॥४६२९।। ता सावय ! मह जायं निमित्तमेत्तं तयं पि निसुणेहि । . अइसयपसंतचित्तो सि तेण साहिज्जई तुज्झ ॥४६३०।।
Jain Education International
For Private & Personal Use Only
www.jainelibrary.org
