________________
४२४
सिरिभुयणसुंदरीकहा ॥ जा विमलमई नामा मह भज्जा सा वि साविया जाया । सेज्झयसावयभज्जाजिणमइसंगेण दिढचित्ता ॥४६४२।। सा पाणिवहपयट्ट मं दटुं सकरुणा निवारेइ । 'पिय ! मा मारसु जीवे नरयफलो जेण पाणिवहो' ॥४६४३।। तोऽहं तिस्सा वयणं अवगन्नंतो हणेमि बहुजीवे । सा वि य अविसंतमणा मं वारइ कूरकम्माओ ॥४६४४॥ कोलुदुरो वि गेहे पाडइ विवराई खाइ वत्थाई । निब्भरपासुत्ताणं चरणतले करडइ अलक्खो ||४६४५।। अह अन्नया पहाए कयसंझावंदणो गमिस्सामि । किर राउलं पविट्ठो चोडयवत्थाई पहिरेउं ।।४६४६॥ जा कड्डिऊण वत्थं निएमि परिहेमि ता असेसं पि । कोलुंदुरेण खद्धं खंडाखंडीकरेऊण ॥४६४७॥ जह निवसणं तहेव य उवरिलं चोडओ वि तह चेव । तिलमित्तं पि न ठाणं तस्सऽत्थि न जत्थ तं खद्धं ॥४६४८।। जा जोएमि सरोसो ता हं नियचोडयस्स गुज्झंमि । पेच्छामि उंदुरं तं निब्भरनिदाए पासुत्तं ।४६४९।। तो तं तत्थ पसुत्तं पच्छिमचरणेहिं रज्जुपासेण । कड्डेमि बंधिऊणं दड त्ति धरणीए घेल्लेमि ।।४६५०॥ तो जणणीमज्जारिं रज्जुनिबद्धं च दाहिणकरेण । वामेण जणयकोलं घेत्तूणं जाव ढोएमि ॥४६५१॥ ता उंदुरो सरोसो वयणग्गविणिग्गयाहिं दाढाहिं । डसिऊणं मज्जारिं तिस्सा खंधं समारूढो ||४६५२।।
Jain Education International
For Private & Personal Use Only
www.jainelibrary.org
