________________
३९९
सिरिभुयणसुंदरीकहा ॥ 'जं जं नरिंद ! मग्गसि दाणनिमित्तं तयं तयं सव्वं । वड्डइ अणंतगुणियं न याणिमो केण कज्जेण? ।।४३६७।। संपइ पुण सेहररायासोयनरिंदाण उचियकरणत्थं । भणिओ तुब्भेहिं अहं भंडारगिहं गओ जाव ॥४३६८॥ ता देव ! थूलनिम्मल-महग्घमणि-रयणनिविडघडियाओ । दिट्ठाओ दोन्नि नरवर ! मज्झे वररयणमालाओ ।।४३६९।। दिट्ठाई देव ! बहुसो तुहप्पसाएण विविहरयणाई । पायं न मच्चलोइयरयणनिवेसो भवे ताण ।।४३७०।। तेओ वि अउव्वो च्चिय निज्जियससि-सूरकिरि(र)णवित्थारो । अणुसिणसिसिरो ताणं पल्हाइयलोयण-सरीरो ।।४३७१।। जइ देवयाणुभावा एवंविहभूसणाई जायंति । न उण इहरा संपइ नरिंद ! तुब्भे पमाणं ति' ||४३७२।। तो भणइ महाराओ ‘अच्छरियमिणं कुमार ! सव्वं पि । जह जह दिज्जइ तह तह भंडारो वद्धए अहियं ।।४३७३।। एयाओ(उ) रयणमालाओ कुमार ! मह विम्हयं पयासंति । अम्हे न एत्तियाणं भायणमिह भागधेयाण' ।।४३७४।। तो भणइ वीरसेणो ‘मा एवं देहि देव ! आएसं । नीसेसपुन्नपरिणइपयरिसभूओ तुमं चेव ।।४३७५।। ता देव ! रयणमालाओ ताओ खयरेसराण दिज्जंति । ‘एवं होउ' त्ति तओ विचित्तजसराइणा भणियं ॥४३७६।। हक्कारिया सपणयं कुमारसीहासणंमि(?) उवविठ्ठा । नियनियपरियणसहिआ सेहरयासोयरायाणो ।।४३७७।।
Jain Education International
For Private &Personal Use Only
www.jainelibrary.org
