________________
३९८
.
सिरिभुयणसुंदरीकहा ॥ तह रिद्धिवित्थरेणं वीवाहमहूसवो कओ तेण । विज्जाहराहिवाणं जह जाओ मणचमक्कारो ॥४३५६।। निव्वत्तिऊण एवं महाविभूईए पहरिसमहग्धं । धूयाविवाहमसमं तो कुमरं भणइ नरनाहो ॥४३५७॥ 'इह विज्जाहरलोओ नियविज्जालद्धिसिद्धि(द्ध)सव्वत्थो । कयकिच्चो ताण कहं मारिसलोओ उवयरेइ? ||४३५८।। जइ न गुणजोग्गयाए गरुयाणं उवयरिज्जइ कुमार! । ता अप्पणो परस्स य गरुयत्तं पडिहयं होइ ।।४३५९।। अवयारो व्व पयासइ उवयारो अणुच्चिउच्चुणा(अणुचिउव्वुणा?) विहिओ। गरुएसु लहू गरुओ लहूसु असमंजसनिमित्तं' ।।४३६०।। इय जाव भणइ राया ता कुमरो तस्स वयणमक्खिविउं । सललियमुदारओच्चियवयणमिणं भणिउमाढत्तो ।।४३६१।। कह उवयारो(रा?)वेक्खी पावइ गरुयत्तणं महिंदो वि ? । रंको वि निरहिलासी नरिंद ! गरुओ सुमेरु व्व ।।४३६२।। नेच्छंति पयइगरुया दाणुवयारं परेहिं कीरंतं । किं तु समुज्जलमाणससिणेहरसमेव वंछंति ॥४३६३।। जाणं सिणेहरहिओ महोवयारो वि तिणलहू होइ । ताणं सिणेहसहिअं तिणं पि कणयद्दिगरुययरं ।।४३६४।। ता जह नरिंद ! संपइ तुह हिययमिमेसु पेमपरतंतं । तह ते उदारओच्चियमन्नं सव्वं पि संपडिही' ।।४३६५।। इय जा नरिंद-कुमरा वयणवियारं करेंति अन्नोन्नं । भंडारिएण राया विन्नतो(त्तो) ता इमं वयणं ।।४३६६।।
Jain Education International
For Private & Personal Use Only
www.jainelibrary.org
