________________
सिरिभुयणसुंदरीकहा ॥
इय विहियसयलमंगल-कोउयसंपुन्नसयलकायव्यो । विन्नविओ सप्पणयं सेहरयासोयराएहिं ॥४३२३।। 'इह देव ! रायउत्तो चंदजसो आगओ सयं दारे । तुज्झाहवणनिमित्तं विचित्तजसरायवयणेण ।।४३२४।। आसन्नं सुमुहुत्तं किज्जउ विजओ कुमार ! नीसेसो । पडिवालइ तुह दंसणसमुज्जुओ जणवओ बाहिं' ॥४३२५।। ‘एवं' ति पभणिऊणं अक्खय-सिद्धत्थ-दहि-दुरुव्वाहिं । दंतुरियसिरो कुमारो आरूढो पट्टहत्थिमि ।।४३२६।। करिराओदयसिहरग्गओइयकुमरिंदुदंसणेणेव । विज्जाहरपुरलोओ पवियसिओ कुम(मु)यसंडो व्व ।।४३२७।। कुमरकरिणो दुपासेसु दो गया तेसु सेहरासोया । करधरियचमरचालण-कणंतकरकंकणा चडिया ।।४३२८।। सिरधरियधवलछत्तो पासनिविटेण बंधुयत्तेण । पवणपघोलिरधवलब्भतलगओ सारयससि व्व ॥४३२९।। अन्नेसु बहुविहेसुं करि-तुरय-महारहेसु नीसेसो । संचलइ समारूढो पहाणलोओ कुमारस्स ॥४३३०।। मंथरचलंतबहुविह-विज्जाहरघणविमाणनिवहेण । सयलं चिय छाइज्जइ गयणयलं ओत्थरंतेण ।।४३३१।। चउभद्दसालसुंदर-बहुवन्नविमाणनिवहसंछन्नं । कयकुंजरक्खरेहाबंधसुचित्तं व गयणयलं ।।४३३२।। नियनियविमाणताडिय-विज्जाहरगहिरतूरसद्दमिसा । जयकारइ व्व कुमरं पडिसद्दमिसेण गयणतहं ।।४३३३।।
Jain Education International
For Private & Personal Use Only
www.jainelibrary.org
