________________
३९६
सिरिभुयणसुंदरीकहा ॥ पडिघरदुवारनिग्गय-पुरनारीविहियमंगलसहस्सो । अणवरयं लायंजलिकयपूओ पुरपुरंधीहिं ।।४३३४।। पडिभवणोवरि बहुपुन्नकलसपल्लवविकिन्नबिंदूहिं । तरुणीहिं पाउसो इव पसरइ कयदुद्दिणारंभो ॥४३३५।। गयणट्ठियविज्जाहरि-करकमलविमुक्ककुसुमघणवरिसो । 'जय जीव नंद वड्डसु' वुड्डाजणदिन्नआसीसो ।।४३३६॥ इय जत्तो च्चिय जोयइ तत्तो च्चिय खयर-पुरजणं नियइ । तक्कल्लाणनिमित्तं कयकोउयमंगलारंभं ।।४३३७।। सो कयभुयणाणंदो आणंदमहासुहं अणुभवंतो । पत्तो विच्छडे(ड्डे)णं मंडवद्दा(दा)रं महावीरो ।।४३३८।। तो कुलवुड्डापयडिय-अणुट्ठियासेसनियकुलायारो । कयमंगलोवयारो जाइ वहु(हू)संनिहाणंमि ॥४३३९।। तो दिन्नपत्थियाहिय-धणविहडियपडविडप्पसंबंधं । पेच्छइ अप्पुव्वं पिव वहुयामुहपुन्निमायंदं ॥४३४०।। सुपसत्थदेहसोहा नियत्थसुपसत्थवत्थरुइरंगी । सुपसत्थवराहरणा पसत्थकयमंगलसहस्सा ।।४३४१।। नियजणणि-जणय-परियण-सोवासिणि-बंधुवग्गपरियरिया । दिट्ठा पहिढवयणा चंदसिरी वीरसेणेण ||४३४२।। पुट्विं लज्जावज्जिय-परोप्पराभिमुहदसणसुहाण । अणुकूलो च्चिअ जाओ तारामेलावओ ताण ।।४३४३।। उम्मेसपसरियाणं ताणं नयणाण पम्हघणपंती । अन्नोन्नसंकमसुहा सोहइ रोमंचराई व ॥४३४४।।
Jain Education International
For Private & Personal Use Only
www.jainelibrary.org
