________________
सिरिभुयणसुंदरीकहा ॥
कह अवणिज्जइ एगेण मज्झ रक्खेण रणरसबुभुक्खा । निव्वडियपोरुसं सेन्नमेव मह पहरइ न जाव || ३०२ || इय चिंतिऊण कुमरो पहरइ पहरंतसव्ववेयाले । दढसंवड्डियरणरस-मच्छरसंजायउच्छाहो ||३०३॥ एक्को वि अणेगाणं रणंगणे अगणियन्नसामत्थो । पीडं जणेइ कत्तिय - मासे जरओव्व सत्ताणं ॥ ३०४ || एक्को तलहत्थपहार - ताडियो पडइ पाडियसहस्सो । पडणपरंपरचमढणभीयं पिव भज्जए सेन्नं ॥ ३०५ ॥ पहरंतभुयादंडं अवरुंडिय संठिए य वेयाले । अच्छोडिऊण पाडइ कीडयनियरेव्व अकिलेसं ||३०६ || तो चिंतेइ कुमारो न किंपि एएहिं बहुतरेहिं पि । गहिऊण तओ चलणे उच्चल्लइ खेत्तवालं पि ॥ ३०७|| तो भाविऊण गयणे तेणं चिय पहरणेण नीसेसं । जा ताडिउं पयट्टो वेयालबलं विरसमाणं ॥ ३०८ ॥ ता अप्पाणं पेच्छइ पुरओ नरनाहमेव एकल्लं । तं पुण वेयालबलं न याणियं कत्थवि गयं ति ॥ ३०९ ॥ तं कत्थ गयं सेनं खंडकवालो वि कत्थ वि पलाणो । अहवा मायाबहुलो वेयालजणो सया होई ॥३१०॥ एत्थंतरम्मि हसिऊण सहरिसं अल्लियंतभुयदंडो । वसुहाहिवस्स सहसा अभि ( ब्भि) ट्टइ जा किर कुमारो ||३११|| ता नरवइणा भणिओ मा मं बीभच्छ ! च्छ्विसु अच्छेप्प ! । वस - मंस - रुहिरलित्तो वेयालसरीरसंगेण ॥३१२॥
Jain Education International
For Private & Personal Use Only
२९
www.jainelibrary.org
7
