________________
सिरिभुयणसुंदरीकहा ॥
३५१ तो तव्वेलारोवियहड्ड(ढ)कड्डियधणुविमुक्कसरनियरो । थलजलहरो व्व कुमरो उद्धं धाराहिं वरिसेइ ।।३८३९॥ अह एक्कमुट्ठिपेसियसहस्स-दुसहस्स-अजुय-लक्खसरो । तम्घायज्जरंगं ओहट्टइ अग्गिबाणबलं ।।३८४०।। अह सभयमसोओ विय नियसेन्नं पेच्छिऊण नासंतं । पुच्छइ ‘किं तुम्ह भयं? जेणेवं पलह भयभीया?' ||३८४१।। तो तेहिं भणियमेवं ‘देव ! पुरो भूमिगोयरो को वि । करधरियचावदंडो पहरइ अत्थक्कबाणेहिं' ।।३८४२।। तो भणियमसोएणं 'न अन्नपुरिसस्स एरिसी सत्ती । सो चेव वीरसेणो संभविही निच्छियं एत्थ ।।३८४३।। ता जाहि चंदसेहर ! सुवेय ! गंतूण कहह कुमरस्स । तुह पडिबले असोओ आगच्छइ न उण कोइ रिऊ' ॥३८४४।। खयरिंदपेसिया ते दो वि समं चंदसेहर-सुवेया । पत्ता कुमारपासं दूराओ(उ) नमंति सप्पणयं ॥३८४५।। दूराओ च्चिय कुमरो पच्चभिनाऊण भणइ ससिणेहं । ए एहिं(हि) चंदसेहर ! सुवेय ! आलिंगसु मम'ति ।।३८४६।। तो तहसणपसरियहरिसंसुपवाहपयडियसेणाहो(सिणेहो) । आलिंगिऊण कुमरो खयरे तत्थेव उवविसइ ॥३८४७।। अह चंदसेहरो वि य सिरिधरियकरंजली भणइ । “देव ! असोएण अहं तुम्ह सयासंमि पट्टविओ ।।३८४८।। भणइ असोओ ‘भुयणे वि तुह पयावानलस्स किमसज्झं ? बहुविहअच्चभु(ब्भु)यपुन्नपवणपरिपोसियस्सेह?' ॥३८४९।।
Jain Education International
For Private & Personal Use Only
www.jainelibrary.org
