________________
३५२
सिरिभुयणसुंदरीकहा ॥ अन्नं किं पि सरूवं तुज्झ पयावानलस्स जं देव !!. निद्दहमाणो वि रिऊ अम्हं पुण हिमकणसरिच्छो ॥३८५०।। तुज्झ अणंता वि रिऊ संमुहमवलोइउं पि न तरंति । करकरवालपरिट्ठियजमरायमहाभएणं व ॥३८५१॥ तुह तेयमसहमाणा पडंति तत्थेव ते पयंग व्व वल्लहगुणेण तं चिय मच्छरतिमिरं पणासेइ ॥३८५२।। पावंति पसंसं इह जयंमि ते च्चिय गुणा गुरुगुणाण । रिउणो वि भिच्चभावं गुणन्नया जेहिं निज्जंति ।।३८५३।। नणु मच्छरो वि अग्घइ सरिसगुणे न उण समहियगुणंमि । पहसिज्जइ खज्जोओ पयर्डतो मच्छरं रविणा ।।३८५४।। मन्नामि निग्गुणं पि हु अप्पाणं एत्तिएण सगुणं च । जं इच्छामि तए सह गुणगुरुणा नेहसंबंधं ॥३८५५।। जाणामि देव ! दोसा न ठंति मह संतिया तुह मणे वि। ता कुणसु मह पसायं करेमि सह दंसणं तुमए ॥३८५६॥ ता सो नमंतखयरिंदमउडमणिकोडिमसिणपयवीढो । बहुविज्जाहरसेणासंभारनिरुद्धगयणवहो ॥३८५७।। जो निज्जिओ वि तुमए पुट्विं रयणायरंतभवणंमि । सो तुह गुणाणुराई विन्नवइ इमं असोओ'त्ति ॥३८५८।। इय खयरचंदसेहरवयणं सोऊण वीरसेणो वि । भणइ 'किमेयं सेन्नं पडिबद्धमसोयरायस्स ?' ||३८५९॥ ‘एवं' ति चंदसेहरभणिए पुण भणइ वीरसेणो वि । 'हा हा ! अन्नाणहओ मन्नामि इमं पि सत्तुबलं ॥३८६०।।
Jain Education International
For Private & Personal Use Only
www.jainelibrary.org
