________________
३३२
सिरिभुयणसुंदरीकहा ॥ ता पुत्त ! मह बलेणं नीसंको जिणसु सत्तुसंघायं । को संमुहं पि जोयइ विचित्तजसरायधूयाए ?' ।।३६३३।। इय एवं सावटुंभवयणे संजायपच्चयं कुमरं । काऊण बंधुजीवा संपत्ता चंदसिरिपासं ॥३६३४।। अइ तइया वीरउरे कुमरेणं जो पबोहिओ पुट्विं । सो अवसरो त्ति मुणिउं संपत्तो रक्खसो तुरियं ॥३६३५।। तो तेण सबहुमाणं सविणयमहिणंदिऊण सप्पणयं । कुमरो सहावपेसलसललियवायाए इय भणिओ ॥३६३६।। 'उप्पन्नो सि जयस्स वि कओवयारो न केवलं मज्झ । अप्पडिहयपयावो रवि व्व हयवेरितिमिरोहो ॥३६३७।। कह तुज्झ पडिहणिज्जइ तेओ तेयंसिएहिं इयरेहिं ? । जाव न विफु(प्फु)रइ रवी ताव च्चिय तारयापसरो ॥३६३८।। इह तिहुयणे तुम चिय साहेज्जं कुणसि नीसहायाण । सो उण हुओ न होही जो तुह साहेज्जयं काही ॥३६३९।। अम्हारिसा नरेसर ! तुह तिव्वपयावजलणधूमं व्व । घणवेरिंधणनिवहं निद्दहिउं होति न समत्था ॥३६४०॥ तो तुज्झ अहं दासो तुमए करुणाधणेण परिकिणिओ । मह विज्जाहरपुंजयअवहरणे देहिं आएसं' ॥३६४१।। तो तव्वयणं सोउं सप्पणयं भणइ वीरसेणो वि । गरुयत्तणस्स उचियं जं किर तं जंपियं तुमए ॥३६४२।। ताव च्चिय गुणनिवहो दूरं विफु(प्फु)रइ निम्मलगुणाण । जाव न अप्पपसंसापंकेणं सकलुसिओ होइ ॥३६४३।।
Jain Education International
. For Private & Personal Use Only
www.jainelibrary.org
