________________
३०३
सिरिभुयणसुंदरीकहा ॥
जइ ते तत्थ न हुंता ता हं सह पउमएविभइणीए । निरवटुंभो सयसिक्करो व्व गयणाओ निवडतो' ॥३३१४।। इय एवमाइ बहुयं तग्गयगुणगहणपयडियप्पणयं । जंपइ वुड्ढाए समं सोवसमं सविणयं कुमरो ॥३३१५।। तो चंदसिरीसमुहं गओ कुमारो अणुब्भडसरूवो । पयडियबहुमाणाए तीअ वि अब्भुट्टिओ सहसा ॥३३१६।। जे तीए पुरा कुमरे जुझंते भयविमिस्सकुवियप्पा । पियदंसणेण ते च्चिय सिंगारमयव्व संजाया ।।३३१७।। तिस्सा मुहं विरायइ आवंडुरगंडकंतिकमणीयं । तव्वेलुग्गयससहरकरकलियं फुल्लकुमुयं व ॥३३१८।। दठूण वीरसेणो चंदसिरिं विरहदुब्बलं भणइ । 'अद्दिट्ठबंधुविरहा बहुदुक्खं पाविया देवि ! ||३३१९।। जह उवणमंति तव्विहकम्मपहावेण देवि ! सोक्खाई । दुक्खाइं तहा तत्थ वि हरस-विसाया विमूढाण ॥३३२०।। जइ विसमदसावडणे न होइ वीरत्तणस्स उवओगो । ता तं निव्विसयं च्चिय उवजुज्जइ कंमि समयंमि ॥३३२१।। ता मा मयच्छि ! नारीसुलहं खेयं मणमि उव्वहसु । जइ अणुकूलो देव्यो ता बंधुयणस्स मेलेमि' ॥३३२२॥ सोऊणं चंदसिरी वयणमिणं हरिसवियसियकवोला । हिययभंतरपसरंतपणयगब्भं पियं भणइ ॥३३२३।। मा अज्जउत्त ! संकसु जमहं किर बंधुविरहदुक्खत्ता । तुह विप्पओयगुरुदुक्खभारपिहियं पिव गयं तं ॥३३२४।।
Jain Education International
For Private & Personal Use Only
www.jainelibrary.org
