________________
२६७
सिरिभुयणसुंदरीकहा ॥ जं निम्मवियं कम्मं कूरज्झवसायसंगयमणेण । अणवच्छिन्नदुरज्झवसाएणं पोसियं निविडं ।।२९१८।। तं जाव नाणुभूयं नरए बहुदिन्नदुक्खसंघायं । कह तस्स ताव अंतो उवायलक्खेहिं वि हविज्ज ? ||२९१९।। जं पुण अन्नाणवसा असुहज्झवसायविरहियं होइ । तं पावं न तहाविहदुक्खाणं कारणं होइ ।।२९२०॥ तं सुगुरुसंगयोगा ववगयमोहंधयारभावेण । पावमिइ जाणिऊणं पच्छायावाइसज्झंति ॥२९२१।। पच्छायावो एक्को न होइ दुक्कम्मनिज्जराहेऊ । जाव न नाणसमेया संजाया चरणपडिवत्ती ।।२९२२।। जिणधम्मतत्तनाणं दुक्कडगरहा य सुक्क(क)डसेवा य । गुणबहुमाणो सुहभावणाओ निहणंति दुकम्मं ॥२९२३।। ता रक्खसिंद ! एसो जिणधम्मो सयलसुहनिहाणं व । कम्मविसपरममंतो भवविडविच्छेयणकुढारो ।।२९२४।। सग्गापवग्गउन्नयभवणारोहाहिरोहिणीदंडो । केवलरविउदयगिरी तं किं जं नेस संभवइ ? ।।२९२५।। ता एत्थ चेव तुमए जिणधम्मे सव्वहा थिरमणेण । समहियगुणजोगेणं महायरो होइ कायव्वो' ।।२९२६।। तो रक्खसेण भणियं 'भयवं ! अम्हारिसो अविरयप्पा । भवउव्विग्गमणो वि य किं पालउ परमधम्मत्थं ?' ।।२९२७।। पुण भणइ मुणी 'निसियर! मा एवं भणसु अविरओ जमहं । न चएमि चरित्तमयं धम्मं किर सेविउं सुद्धं ॥२९२८।।
Jain Education International
For Private & Personal Use Only
www.jainelibrary.org
