________________
२६८
सिरिभुयणसुंदरीकहा ॥ पढमं पालसु सम्म सम्मत्तं मोक्खविडविवरियं(?) व्व । करुणापहाणधम्मं पुण मन्नसु साहवो सुगुरू ।।२९२९।। परिहर तिविहेण तुमं पासंडिपयासिए कुधम्मपहे । अन्नाणफला एए तुह अणुहवओ वि पच्चक्खा ॥२९३०।। जे कूरज्झवसाया कम्माइं य जाइं तुज्झ कूराई । वयणाई कढोराइं परिहरसु तुमं असेसाइं ॥२९३१॥ होऊण पसंतप्पा कुणसु दयं सव्वभूयगामेसु । नियरिद्धि-सत्तिसरिसं पवयणउब्भावणं कुणसु ।।२९३२।। इह साहु-साहुणीणं पुण सावय-सावियाण सत्तीए । कुरु पडणीयविघायं एसो संघो जओ पुज्जो ॥२९३३।। कुणसु जिणाणं महिमं गरुयगुणमुणीण पक्खवायं च । . एएण उवाएणं नित्थरिह(हि)सि भवसमुद्दमिणं' ।।२९३४।। इय केवलिभणियमिणं वयणं सोऊण रक्खसो भणइ । 'जं भणसि मुणिंद ! तुमं तह त्ति तमहं करिस्सामि ।।२९३५।। तुह वयणं निसुयं चिय चउगइभवजलहितारयं होइ । किं पुणमजहत्थभणियाणुट्ठाणकयं न तुं होइ ?' ।।२९३६।। इय भणिउ(ऊ)णं विरए निसायरे भणइ नरवई एवं । 'भयवं ! इह संसारे अम्हं उवयारिणो दोन्नि ॥२९३७॥ पढमं तुममुवयारी संसारमहाडवीनिवडियाण । पयडियसुधम्ममग्गो जाओ परलोयपक्खंमि ॥२९३८॥ इहलोइयंमि पक्खे संबोहियरक्खसो महासत्तो । भुयणस्स भयंतकरो पच्छा एसो महावीरो ॥२९३९॥ .
Jain Education International
For Private & Personal Use Only
www.jainelibrary.org
