________________
सिरिभुयणसुंदरीकहा ॥ संपइ पुण परिचत्तो पुरिसवहो निसि पुरे परिभ(ब्भ)व(म)णं । परपीडाइ असेसं कल्लाणसुमित्तवयणेण ।।२९०७।। तुह दंसणेण मुणिवइ ! एन्हिं पुण जायनिच्छओ धम्मे । इह पुव्वभवसमज्जियगुरुपावभएण भीओ म्हि ।।२९०८।। ता एयाण निरंतर-नरयमहादुक्खकारणगुरूण ।। कह णु करिस्सामि अहं पज्जंतं पावकम्माण' ।।२९०९।। तो तव्वयणविरामे भणइ मुणी सयलकेवलालोओ । 'निसियरनरिंद ! निसुणसु सुसावहाणो तुह कहेमि ।।२९१०।। . चइऊण तमन्नाणं अन्नाणनिबंधणं च मिच्छत्तं । सम्मन्नाणाहिगयं सेवसु जिणदेसियं धम्मं ॥२९११।। गरहसु सम्मं मणसा इह-परलोएसु जायिं विहियाई । पुव्वबहुदुक्कडाइं नरयनिवासेकहेऊणि ।।२९१२।। सुविसुद्धभावमारुयपसरियअणुतावजलणजालाहिं । पज्जालिज्जइ सयलो बहुभवपाविंधणसमूहो ।।२९१३।। एसो पच्छायावो दुक्कडकम्माण बहुभवकयाण । ओच्छायणं हि परमं अणवरयं तेण कायव्वो' ।।२९१४।। तो भणइ रक्खसिंदो ‘भयवं ! जं नरयकारणं पावं । तं कह निज्जरइ महं पच्छायावेण एक्केण ॥२९१५।। जाव न तं अणुहूयं नरएसु गयागएहिं बहुएहिं । कह तस्स ताव अंतो होही मह दुकयकम्मस्स ?' ||२९१६।। पुण भणइ मुणिवरिंदो ‘एवं न पिसायराय ! निसुणेसु । कम्माण जं विचित्तो परिणामो जिणमए भणिओ ॥२९१७।।
Jain Education International
For Private & Personal Use Only
www.jainelibrary.org
