________________
२२९
सिरिभुयणसुंदरीकहा ॥
तेहिं चिय विणिउत्तो सम्मदि(द्दि)ट्ठी महाबलो जक्खो । सो पडिणीयविघायं अणवरयं कुणइ जिणभवणे ।।२५०१।। अणवरयं कल्लाणय-चाउम्मासाइ पव्वदिव्व(व)सेसु । अन्नेवि सुरा असुरा खयरा इह एंति जत्ताए ॥२५०२।। इय काउं चेइयहरं आसंसारं च तस्स निव्वाहं । कयसंतिपायपूया पुणो गया देवलोयंमि ॥२५०३।। तत्थ वि पयइमणोहरविसयसुहासत्तमाणसा दो वि । भुंजता पुव्वकयं पुन्नफलं तत्थ अच्छंति ॥२५०४।। तत्तो कालक्क(क)मेणं चविया वेयड्डपव्वयवरंमि । सिद्धत्थपुरे राया अमियबलो खेयरो अत्थि ॥२५०५।। भज्जा से सीलवई सीलनिहाणं च तीय गब्भंमि । उप्पन्ना दो वि समं जुवलगभावेण पुत्त त्ति ॥२५०६॥ उचियसमएण जाया कयाइ नामाई ताण जणएण । अकलंक-निम्मल त्ति य कुमारभावं दुवे पत्ता ॥२५०७।। कयदारसंगहा ते भुंजंति जहासुहं विसयसोखं । संसिद्धविविहविज्जा समहियलावन्न-रूवगुणा ॥२५०८।। आबालओ य तेहिं सुधम्मसामिस्स पायमूलंमि । लद्धो संसारमहासमुद्दजाणं व जिणधम्मो ॥२५०९।। भावियजिणवयणत्था अप्पकसाया प्प(प)मायपरिहीणा । पुव्वभवजायनेहा दो वि सुहं तत्थ चे(चि)टुंति ॥२५१०।। अह अन्नया गया ते अट्ठावयसिहरजिणहरहि(ठि)याण । चउवीसाण जिणाणं वंदणवडियाए पव्वंमि ।।२५११।।
Jain Education International
For Private & Personal Use Only
www.jainelibrary.org
