________________
२३०
सिरिभुयणसुंदरीकहा ॥ दिट्ठो तत्थ गएहिं सोहम्मसुराहिवो विमाणेहिं । झंपंतो इव वियडं नहंगणं पंचवन्नेहिं ।।२५१२।। तो पुव्वगया पूएंति जाव विज्जाहरा जिणवरिंदे । बहुभत्तिनिब्भरुल्लसियपुलयपडला समं दो वि ।।१३।। ता सकेणं दिट्ठा जिणेकगयनयण-हिययवावारा । समकालखित्तदससयपसारियच्छेण परिओसा ॥१४॥ . तो भणिया इंदाणी सुरवइणा 'दो वि लक्खिया एए । जे परमभत्तिजुत्ता तुह पुरओ देवमच्चंति ? ।।२५१५।। एए सोहम्मविमाणवासिणो आसि जे सुओलावा । ते संपइ विज्जाहरजुयलत्तेणं समुप्पन्ना' ॥२५१६।। देवीए तओ भणियं 'जाणामि विसेसओ दुवे जेहिं । वसुहाए परिववियं जिणभवणं सरपरिक्खित्तं' ।।२५१७।। तो सुरवइणा अभिवाइऊण संभासिया दुवे जुगवं । 'किं परमजोइ-महाजोइ ! तुम्ह कुसलं ?' ति ते पुट्ठा ।।२५१८।। तेहिं पि अलक्खियदेवजम्मनामेहिं पभणियं ‘देव ! । तुम्ह पसाएण सया कुसलं चिय अम्ह सुरनाह ! ।।२५१९।। कह नाह ! परमनाणी वि अन्ननामेहिं अम्ह वाहरसि? । अन्नाई चिय सुरवइ ! नामाइं न अम्ह एयाई' ।।२५२०॥ तो सव्वं सुरवइणा विंझाडइ-वडनिवास-सुयमाई(इ) । अट्ठावयपज्जंतं चरियं परिकहियमेएसिं ॥२५२१।। सोऊण पुव्वजम्मं सविम्हयं ताण तक्खण च्चेय । जाइस्सरणं जायं अणुहूयभवेसु पच्चक्खं ॥२५२२।।
Jain Education International
For Private & Personal Use Only
www.jainelibrary.org
