________________
२२३
सिरिभुयणसुंदरीकहा ॥ पंचिंदिएसु तत्तो जल-थल-गयणयलचारिसु बहूसु । उप्पज्जइ कम्मवसो जीवो सद्धम्मपरिहीणो ॥२४३५॥ ता पंचिंदियजाई तिरिओ सि तुमं भवंतरकयाण । कम्माण अणुहवंतो चिट्ठसि अइदूसहविवागं ||२४३६।। एत्तो तुज्झ विमोक्खो न केवलं कीर ! तिरियभावाओ । जिणधम्मनिच्छयवओ होही संसारमोक्खो वि ।।२४३७।। जिणधम्मो कीर! दुरंतदुक्खसंसारजलहिपडियाण । जीवाण मोक्खपरतडगमणमि तरंडमिव होइ ।।२४३८।। तं नत्थि जं न सिज्झइ जीवाण जिणिंदधम्मनिरयाण । हीणुवमा कप्पद्रुम-चिंतामणिमाइणो तस्स ।।२४३९।। कह ते पडंति अइविसमघोरनरयंधकूवमझमि । संपडइ जाण एसो हत्थालंबोव्व जिणधम्मो ॥२४४०॥ तो तत्थ तएऽवस्सं निव्विन्नेणं सुयत्तभावाओ । परमायरो विहेओ जिणिंदधम्मंमि सुयराय ! ॥२४४१।। सो उण धम्मो दुविहो जइ-सावयभेयओ समक्खाओ । पढमो दसप्पयारो इयरो उण बारसवियप्पो ॥२४४२।। खंती य मद्दवज्जव-मुत्ती-तव-संजमे य बोधव्वे । सच्चं सोयं आकिंचणं च बंभं च जइधम्मो ॥२४४३।। पंच य अणुव्वयाइं गुणव्वयाइं च होति तिन्नेव । सिक्खावयाइं(इ) चउरो गिहिधम्मो बारसविभेओ ।।२४४४।। एयस्स दुभेयस्स उ सम्मत्तं परमकारणं होइ । संकाइदोसरहियं सुहायपरिणामरूवं च ।।२४४५।।
Jain Education International
For Private & Personal Use Only
www.jainelibrary.org
