________________
२१८
अह ताण सुयकुलाणं पहाणभूओ विसेसगुणकलिओ । जरजज्जरियसरीरो रायसुओ वसइ तत्थेगो ॥२३८०।। अह तस्स दोन पुत्ता रायसुया संति कोमलसरीरा । कोमलचंचुनिवेसा अइकोमलनीलपक्खउडा ।। २३८१ ।। जणणि जणपाण दूरंगयाण ते उड्डिऊण अन्नदिणे । थेवंतरेण पडिया पुलिंदघणसालिछेत्तंमि ॥२३८२ ।। तो पुव्विं परियप्पिय पासयबंधंमि निवडिए कहवि । दठूण ते पुलिंदो तुरियगई तत्थ संपत्तो ॥ २३८३ ॥ तो छोड़िऊण पासं धरिया ते तेण दोवि बालसुया । दट्ठूण हरिसिएणं पंजरयब्भंतरं छूढा || २३८४।। अह तत्थ सत्थवाहो बहुसत्थसमन्निओ विविहभंडो । नामेण भद्दसेणो समागओ तेण मग्गेण ॥२३८५ ॥ तो घेत्तूण पुलिंदो रायसुए भद्दसत्थवाहस्स । ढोयइ भद्देण तओ निरक्खिया दो वि ते पक्खी ||२३८६ ॥ नाऊण सत्थवाहो विसेसगुणसंगए य ते दो वि । संगहइ तस्स य पुणो देइ पुलिंदस्स उचियत्थं ॥२३८७ ॥ सो भद्दो रायसुए पाढइ कोऊहलेण जं किंपि । तं ताण एकवाराए पुव्वपढियं व संठाइ ॥२३८८॥ एवं ते रायसुया सुय व्व भद्दस्स वल्लहा जाया । पालइ परमसिणेहा संपाइयसयलतक्कुज्जो ||२३८९ ।। अह सो वि भद्दसेणो अणवरयपयाणएहिं संपत्तो । नामेणं रयणउरं नयरं नीसेसगुणकलियं ॥२३९०।।
Jain Education International
सिरिभुयणसुंदरीकहा ॥
For Private & Personal Use Only.
www.jainelibrary.org.
