________________
२०९
सिरिभुयणसुंदरीकहा ॥
ता हं जइ एत्थ निएहिं जणि-जणएहिं कोइ उप्पन्नो । ता जेऊण असोयं हढेण आणेमि चंदसिरिं ॥२२७९॥ जाणामि तीए हिययस्स निच्छयं मरणसमयगयावि । नाहिलसइ तमसोयं महासई जं कुलुप्पन्ना ॥२२८०॥ इय चिंतिऊण हियए काऊण विणिच्छयं सयं चेव । सो वीरसेणकुमरो काउं गुरु-देवपयपूयं ॥२२८१॥ तो अकहंतो मित्तस्स परियणस्स वि य ‘पत्थू(त्थु)यविघायं । मा काही' एक्कंगो विणिग्गओ सो महावीरो ॥२२८२।। तो चउसुं वि दिसासुं सउणं अवलोइऊण उवउत्तो । अणुकूलसउणसूइयदाहिणदिसिसंमुहो चलिओ ।।२२८३।। तो वियडपयक्खेववकृमियधरावीढ-वड्डिउच्छाहो । अगणियमग्गपरिस्समपमुहदुहो वच्चइ तुरंतो ॥२२८४।। 'गोपयमेत्तं वसुहा सारणिमित्तो य सायरो होइ । लहुगंडसेलमेत्ता धरणिहरा वीरपुरिसाण ॥२२८५।। तणमेत्तं पि हु कज्जं मेरुसमं होइ हीणहिययस्स । मेरुगरुयं पि तणमिव अज्झवसइ साहससहाओ ॥२२८६॥ स(सु)कुमारसरीरा वि हु हियए जे वज्जसारघडियव्व । न हु ताण सरीरकयं दुक्खं हिययम्मि बाहेइ' ॥२२८७।। इय एवमाइ कुमरो गरुयावटुंभसंगयं हियए । चिंतंतो संपत्तो कमेण एगं महा[अडविं ॥२२८८।। जा सरलताल-हिंताल-सल्लई-सायसाहिसंकिन्ना । वल्लीवियाण-दढगुच्छ-रुक्खहयपहियसंचारा ॥२२८९॥
15 Jain Education International
For Private & Personal Use Only
www.jainelibrary.org
