________________
१९५
सिरिभुयणसुंदरीकहा ॥
अइविसमो पेम्मरसो जम्हा जं वीरसेणवेयल्लं । बंधुयणसोयणिज्जं तं चिय मह पहरिसनिमित्तं' ||२१२४।। इय एवमाइ चित्ते चिंतंती जायतग्गयवियप्पा । चंदसिरी नियएसु वि अंगेसु न माइ हरिसेण ॥२१२५।। सिरिवीरसेणअणुराय-सवणसंजायपहरिसुकुरिसा । सीयलपवणमिसेणं पुलयं निण्हवइ रायसुया ॥२१२६।। तो भणइ विलाससिरी 'निहुयं समओ वि तस्स आगमणे । आसण-तंबोलाइ कीरइ सव्वंपि सन्निहियं ।।२१२७।। पुव्वागयाओ अम्हे सागयमम्हेहिं तस्स कायव्वं । काऊण अवटुंभं हियए परिहरह मुद्धत्तं' ॥२१२८।। चंदसिरीए भणियं 'पियसहि ! जं किंपि होइ तं होउ । मह नत्थि वसे हिययं कुणसु तुमं सव्वमुचियत्थं' ॥२१२९।। तो भणइ विलाससिरी 'सव्वं जं भणसि तं करिस्सामि । परमेगं पत्थिस्सं तं तुमए अवस्स कायव्वं' ।।२१३०।। 'भणसुत्ति रायधूयाए जंपिए भणइ पुण विलाससिरी । 'अणुकूलिमाए पियसहि ! आराहसु पिययमं अज्ज ॥२१३१।। 'अणुकूलत्तणदिढगुणसंजमियं चंचलं पि पयईए । न चलइ मणं जणस्स वि विसेसओ हिययदइयस्स ॥२१३२॥ एयं चिय वसियरणं एयं चिय दुव्वियप्पसंवरणं । एयं चिय चउरत्तं पियम्मि जं आणुकूलत्तं' ।।२१३३।। तो भणइ रायधूया ‘सहि ! मह हिययाणुकूलिमाए वि । रंजिस्सइ सो सुहओ जइ सच्चं सो च्चिय कुमारो ॥२१३४।।
Jain Education International
For Private & Personal Use Only
www.jainelibrary.org
