________________
१९४
सिरिभुयणसुंदरीकहा ॥
एयरस संपयं चिय संजाया एरिसी महावत्था । चंदसिरी पुण अज्ज वि इमस्स नामं पि न मुणेइ || २११३॥ को जाणइ नियधूयं कस्स वि दाही विचित्तजसराओ ? । अमुणियतयभिप्पाओ तं कह पत्थेमि कुमरत्थे ? || २०१४ | जत्थ न पसरइ बुद्धी न विकमो तं दुसज्झमिह कज्जं । सिज्झइ जइ पर तुरियं चक्केसरिपयपसाएण ।। २११५ ।। ता एसच्चिय देवी अइदुत्थियलोयकप्पवल्लिव्व । चक्केसरी करेही करुणाए इमस्स स ( सं ) नेज्झं ' ॥२११६॥ काऊण निच्छयमिणं अहमिह चक्केसरीए पूयत्थं । पइदियहं विणिउत्तो बंधुयत्तेण मित्तेण ।।२११७।। पढमं आगंतूणं देवं पूएमि सव्वविहिपुव्वं । पच्छा एइ कुमारो सबंधुयत्तो पणामत्थं ॥२११८।। पइदियहं जाव न चक्किणीए परमेसरीए पयकमलं । पणमइ न ताव भुंजइ सो वीरवई महासुहडो' ।।२११९।। तो तव्वयणं सोउं चंदसिरी हरिसवियसियकवोला । आणंदबाहनीसंदसुंदरं वहइ मुहकमलं ॥ २१२० ।। मन्नइ स (सु) कयत्थं चिय अप्पाणं पिययमाणुराएण । तेलोक्काहिवइत्तण- लाभेण व वहइ आनंदं ॥ २१२१।। 'जायंम्हि अज्ज संजीवियंम्हि अज्जेव जम्मसाफल्लं । अज्जं चिय फलियं मह गुरूण आसीपयाणेहिं ।।२१२२॥ एत्तियमेत्तेणं चिय सलहिज्जइ इह असारसंसारो । अवरोप्परपेम्मपरव्वसाण जं होइ रमणीओ ।।२१२३ ।।
Jain Education International
For Private & Personal Use Only
www.jainelibrary.org
