________________
१९३
सिरिभुयणसुंदरीकहा ॥
पुण भणइ विलाससिरी 'पुरओ साहर कुमारवुत्तंतं ।' चंदसिरीए भणियं 'गोवद्धण ! कहसु मह पुरओ ॥२१०२।। निसुएण वि तस्स महाणुभावचरियस्स वीरसेणस्स । नामेण वि पल्हायइ मह अंगं पुलयमुव्वहइ' ॥२१०३।। तो बंभणेण भणियं 'विचित्तजसरायवल्लहा धूया । इह कावि अत्थि नयरे चंदसिरी विजियरइरूवा ।।२१०४।। विन्नाणगुणनिहाणं नीसेसकलाकलावपरिकलिया । सा दिट्ठा अन्नदिणे ससिणेहं वीरसेणेण ॥२१०५।। तदंसणदियसाओ पभिई सो तारिसो महासुहडो । मयणसरजज्जरंगो कायरपुरिओ व्व संजाओ ।।२१०६।। चिंतावसपरियप्पियदइयापरिरंभजायरोमंचो । सच्चवियनियवियारो पुणरवि[स] विलक्खिमं वहइ ।।२१०७।। दइयानिमित्तबहुविहवियप्पजालाणुरूवकयचेट्टो । तब्भावरसो वियरइ नडोव्व नाणाविहवियारो ॥२१०८।। विरयनिमेसुम्मेसो निच्चलपम्हउडदीहप(पि)हुलच्छो । सो जणइ सुरकुमारभमेण लोयाण आसंकं ॥२१०९।। जे हियए वि न सम्मति जे न वोत्तुं पि जंति वयणेहिं । ते तारिसा वियारा तयलाहे तस्स संजाया ॥२११०।। दठूण बंधुयत्तो चंदसिरिअलाहदुत्थियं कुमरं । संकंततढुहो इव ससंकचित्तो विचिंतेइ ॥२१११॥ 'अहह ! अइविसममेयं समुवट्ठियमविसयं मह मईए । कज्जं गरुयत्तणदुग्गहं व हियए न संठाइ ।।२११२।।
Jain Education International
For Private & Personal Use Only
www.jainelibrary.org
