________________
सिरिभुयणसुंदरीकहा ॥
१८९ नयरुव्वेढपइन्ना-निसुणणसंजायपहरिस-विसाओ । मा कहवि होज्ज कुमरस्स पच्चवाओ रिऊहिंतो ॥२०५८।। इय जावच्छइ समहिय-सच्चरियायन्नणुच्चरोमंचो । वीरेण पेसियं ता नियई राया नरिंदोहं ।।२०५९।। तो वीरसेणपेसिय-पहाणपुरिसेहिं रक्खियं दिटुं । नरवइणा अच्चब्भुय-विम्हयरसधुयसिरत्तेण ॥२०६०।। कहियं पहाणपुरिसेण 'देव ! एए असेसनरवइणो । हरिधम्मरायपमुहा तुह रिउणो ! आणिया एत्थ ।।२०६१।। एकंगेण वि सिरिवीरसेणकुमरेण नियभुयबलेण । चोरव्व बंधिऊणं तुज्झ सयासम्मि पट्टविया ॥२०६२।। ता एयाण सयं चिय जं जोग्गं होइ तं तुमं कुणसु । इय मज्झ मुहेण इमं विन्नत्तं तुज्झ कुमरेण' ।।२०६३।। तो भणइ विचित्तजसो 'अच्छंतु इहेव ताव नरनाहा ।' आइस्सइ पहिट्ठमणो पडिहारभडाण कायव्वं ॥२०६४।। 'रे ! वीरसेणकुमरागमम्मि कारेह उच्छवं नयरे । विहिउज्जलनेवच्छो चलउ जणो कुमरपच्चोणिं ॥२०६५।। अहयं पि एस चलिओ सपरियणो वीरसेणपासम्मि ।' पडिहारेहिं असेसं अणुट्ठियं रायवयणं पि ॥२०६६।। महया सम्मद्देणं नियपरियण-पौरजणवयसमेओ । राया कुमारपासं सह पत्तो बंधुयत्तेण ।।२०६७।। उत्तरइ करिंदाओ कुमारमुहकमलखित्तथिरनयणे(णो)। दूरपसारियबाहू आलिंगइ परमनेहेण ॥२०६८।।
Jain Education International
For Private & Personal Use Only
www.jainelibrary.org
