________________
૨૮૮
सिरिभुयणसुंदरीकहा ॥ जइ हं कोवि मणुस्सो जइ जाओ सूरसेणराएण । ता अज्ज चेव इह तुह पुरम्मि उव्वेढयं काहं" ।।२०४७।। अट्टालयपुरिसेहिं रायाणुमओ पवेसिओ मित्तो । एत्तो य वीरसेणो संपत्तो कडयमज्झम्मि ॥२०४८॥ हरिधम्मनामधेयस्स जाइ सेणाहिवस्स पासम्मि । गंतूणं तं बंधइ पच्छाहुत्तेहिं बाहूहिं ।।२०४९।। तं पुरओ काऊणं वच्चइ सव्वेसु रायगेहेसु । ते वि तहच्चिय बद्धा रायाणं बारससहस्सा ॥२०५०।। पेच्छंतस्स य लोयस्स सयलसेन्नाण चाउरंगाण । कुमरेण कयंतेण व अप्पडियारेण ते धरिया ॥२०५१।। धरिऊण य तव्वेलं विचित्तजसराइणो समप्पेइ । सव्वाइं य सेन्नाई अनायगाइं पणट्ठाइं ।।२०५२।। तो जाओ उव्वेढो संजाओ सुत्थिओ जणो सव्वो । पविसंति सव्वओ च्चिय जवसिंधण-धन्नमाईण ॥२०५३।। तो बंधुयत्तकहियं सोउं सिरिसूरसेणवुत्तंतं । तदुक्खदुक्खियप्पा मणागमासासिओ राया ॥२०५४।। वणदेवीपरिवालियकुमारवुत्तंतसवणपुलयंगो । समहियसंपत्तसुहो संजाओ हरिसपडहच्छो ।।२०५५।। सोउं नरसीहस्स य माणब्भंसं कयं कुमारेण । अउरुव्वविम्हउप्फुल्ललोयणो वहइ आणंदं ॥२०५६।। एत्थागओत्ति निसुए तिहुयणरज्जाहिसेयतुट्ठो व्व । अंगम्मि अमायंतो हरिसरोमंचमुव्वहइ ॥२०५७।।
Jain Education International
For Private & Personal Use Only
www.jainelibrary.org
