________________
१९०
सिरिभुयणसुंदरीकहा ॥ चुंबइ सिरम्मि कुमरं कुमरो पिउनिव्विसेसबुद्धीए । पणमइ रायं सिरसा सिरविरइयपंजलीबंधो ।।२०६९।। भणइ नरिंदो 'तुह कुसलवट्टमाणि(णिं?) कहन्नु पुच्छामि ? । जो भुयणस्स वि कुसलं करेइ कह अकुसलयं तस्स ? ।।२०७०।। नणु संठियो सुहेणं ? वयणमिणं वीर ! पडइ ववहारे । दुक्खासंका कह तस्स जस्स आणाकरा देवा ? ||२०७१।। पुन्नेहिं तुज्झ दंसणमिमंपि उवयारतप्परं वयणं । पयडाइं चिय अरिबंधणेण मह जेण पुन्नाई ।।२०७२॥ जोग्गो सि गरुयरिउनिग्गहेत्ति वयणस्स नत्थि अवयासो । नरसीहनिग्गहेण वि सजोग(ग्ग)या पयडिया तुमए ॥२०७३।। जमहं किर पुच्छिस्सं चरियाई चिय कहंति तं तुज्झ । इय निरवयासवयणस्स मज्झ न फुरंति वयणाइं ॥२०७४।। वयणेहिं कहिज्जंतो केत्तियदूरं गुणा सुणिज्जंति । ते च्चिय सच्चरिएहिं पयडिज्जंता पवढंति ।।२०७५।। सामन्नगुणाणं चिय सामन्नमई गुणा पसंसंति । नीसामन्नाण पुणो नीसामन्ना जइ मुणंति ॥२०७६।। नियमइसरिसं चिय फुरइ माणसं वरकईण विसएसु । ताणं पि हु निव्विसयाई चित्तचरियाई वीराण' ।।२०७७।। इय निब्भरगरुयगुणाणुरायवियडुल्लसंतवयणस्स । रायस्स वयणमक्खिविय भणइ पुण वीरसेणो वि ॥२०७८॥ “गरुयाण नियगुरुत्तण-सरिसा संभावणा मणे फुरइ । अमयमयस्स व ससिणो किरिणा अमयं चिय मुयंति" ॥२०७९।।
Jain Education International
For Private & Personal Use Only
www.jainelibrary.org
