________________
१६६
सिरिभुयणसुंदरीकहा ॥ इय चिंतिऊण तुरियं आइट्ठा तेण नियपुरिसा ।।१८०६।। रे रे ! तुरियं तुरियं इहइं आरुहह देउलस्सुवरि । किं कोवि एत्थ अच्छइ नो वा ? मह कहह नाऊण ।।१८०७।। तो तव्वयणाणंतर-मारूढा तत्थ दारुणा पुरिसा । दिट्ठो हं तेहिं तओ बद्धो कयपच्छिमभुएहिं ।।१८०८।। 'लद्धो लद्धोत्ति तओ तेहिं कओ कलयलो मणुस्सेहिं । खित्तो 'दड'त्ति धरणीए दूरभायाओ पावेहिं ।।१८०९।। नीओ नरिंदपासं तेण वि कुविएण पभणियं एवं । कह पव्वयाओ खित्तो वि एस पुण जीविओ पावो ? ।।१८१०।। तो नरवइणा भणियं तुरियं रे दंडवासिय ! समप्प । . चंडालमणुस्साण निग्घिणचित्ताण पयईए ॥१८११।। तो तेहिं रायवयणं तहेव संपाडियं तलारेहिं । ताण अहं दुट्ठाणं समप्पिओ चोरपुरिसोव्व ॥१८१२।। भणियं च तेहिं “एसो मंती सिरिसूरसेणरायस्स । एयम्मि जीवमाणे न मुओ सूरोत्ति जाणेह ।।१८१३।। ता सव्वहा पयत्तेण एस जह कोवि न मुणइ जणेसु । तह मारह जह एसो न रक्खणीओ महासत्तू" ||१८१४।। ते एवं भणिऊणं वलिऊण गया पुरीए इयरेहिं । चंडालेहिं य अहयं नीओ किर वज्झठाणम्मि ।।१८१५।। तो तेहि कड्डिऊणं. निसियासिं पभणिओ अहं “मंति ! । सुमरसु अभिट्ठदेवं कुद्धो तुह रायनरसीहो" ||१८१६।। एत्थंतरम्मि एगेण डुंबपुरिसेण जायकरुणेण ।
Jain Education International
For Private & Personal Use Only
www.jainelibrary.org
