________________
सिरिभुयणसुंदरीकहा ॥
पुरिसेहिं लोढिऊणं पक्खित्तो च्छिन्नटंकम्मि ।।१७९५।। तो कम्म-धम्मजोया आउयसेसत्तणेण लग्गोहं । निवडतो गिरितडतरु-साहग्गे देवजोएण ॥१७९६।। तो सणियं उत्तरिओ भयभीओ तत्थ गिरिनिगुंजम्मि । गमिऊण सव्वदिवसं विणिग्गओ निसि पओसम्मि ॥१७९७।। तो पुत्तसिणेहेणं पुणो वि चंपं समागओ तत्थ । दिट्ठो कहवि न पुत्तो बहुरक्खणरक्खिओ जम्हा ।।१७९८।। तो तम्मि चेव एगम्मि जुन्नदेवउलउवरिमतलम्मि । संगहियसंबलो तत्थ संठिओ गममि सव्वदिणं ।।१७९९।। रयणीए पुणो तम्हा उत्तरिऊणं भमामि चंपाए । काऊण पुत्तसुद्धिं देवउलं जामि पच्चूसे ||१८००।। एवमहं अणुदियहं कलत्त-पुत्ताण मोयणनिमित्तं । चिंतेमि बहुउपाए न . य मोउं ताई सक्केमि ।।१८०१॥ एवं च अन्नदियहे आरूढो देउलम्मि जा तत्थ । ता पहरमेत्तदियसे समागओ तलवरो रोद्दो ।।१८०२।। सो मत्तवारणोवरि उवविठ्ठो जाव अच्छइ खणद्धं । ता तस्स गया दिट्ठी देउलथंभंतरालम्मि ॥१८०३।। दिट्ठा य तेण घयगुल-मीसियबहुमडंयाण खंडाइं । उव्वहमाणा ओल्ली उत्तरंती पिवीलीण ||१८०४।। दठूण तेण हियए विमंसियं कत्थ मंडया उवरि । जेणेयाओ एवं उवरिमभायाओ इह एंति ॥१८०५।। ता नूण किंपि होही कारणमिह ता निएमि उवरितलं ।
Jain Education International
For Private & Personal Use Only
www.jainelibrary.org
