________________
१५२
सिरिभुयणसुंदरीकहा ॥ धरिओ च्चिय उभयभुएसु सूरसेणो सकीयचरणेण । तं वच्छयले ताडइ पुणो वि मुहनिंतरुहिरोहं ॥१६५३।। तो सूरसेणदिढपाय-पह(हा)रवियणापरव्वसो सहसा । मुच्छानिमीलियच्छो रहोवरिं पडइ लुलियंगो ||१६५४।। तो सूरो निक्कारिम-तप्पोरुसरंजिओ सयं कुणइ । वत्थंचलेण पवणं सिसिरजलेणं च सिंचइ य ।।१६५५।। भणइ समासत्थं तं इहेव सरहे ट्ठिओ पुणो जुझं । अहयं पुण अन्नरहं पज्जुत्तं आरुहिस्सामि ।।१६५६।। तो गरुयत्तणपिसुणं ववहरणं पेच्छिऊण सूरस्स । पुण भणइ डमरसीहो अहिमाणधणो महासुहडो ।।१६५७।। हे सूरसेण ! दिन्ना कन्नच्चिय घेप्पए न जयलच्छी । तुह सेवियमग्गेणं हढेण सरहं गमिस्सामि ॥१६५८।। ता होज्ज सावहाणो मा भणिहसि जं न साहियं मज्झ । इय भणिऊ णं सूरो पक्खित्तो तेण गयणम्मि ।।१६५९।। तो लहु संधाणविसंधेएहिं अटुंदु-सरसमूहेहिं । दो खंडिस्सइ सूरं निवडतं जाव किर डमरो ।।१६६०।। ता सूरेण वि गयणे दूरं खेत्तेण एकखयराओ । हढहरियफरकिबाणेण आहओ डमरसीहो वि ।।१६६१।। पडियम्मि डमरसीहे गरुयाइं वि ताइं सत्तुसेन्नाई । घणवंद्राई सुपयंडपवणफट्टाई नट्ठाई ।।१६६२।। एत्थंतरम्मि सहसा संधीरंतो असेससेन्नाई । अइगरुयबलपरक्कम-माहप्पसमुत्तुणो सुहडो ॥१६६३।।
Jain Education International -
For Private & Personal Use Only
www.jainelibrary.org
