________________
१४२
सिरिभुयणसुंदरीकहा ॥ बहलमलपंककलुसा मुक्का चिरबंधणेहिं खीणंगा । मुणिणो व्व गुत्तिपुरिसा निव्वुइसोक्खं अणुहवंति ।।१५४३॥ परिहरियरज्जनीई(इं?) निद्दोसंतेउरप्पवेसं च । दूरोसारियनीसेस-दारपडिहारसंरोहं ॥१५४४।। समसामि-दासवग्गं समवुड्ड-सिसुं च समगुरु-लहुं च । समसिट्ठा-सिट्ठजणं सममत्ता-मत्तवग्गं च ।।१५४५।। समकुलवहु-वेसजणं समपरियर-नयरपउरलोयं च । जायं वद्धावणयं नरिंदसुयजम्मदिवसम्मि ||१५४६।। कत्थवि गौरवियमहा-अमच्चनच्चणपवड्ढियाणंदं । उम्मत्तथेरदासी-नट्टपयटुंतजणहासं ॥१५४७।। मइरापाणपरव्वसवेसापरिरंभमाणजरपुरिसं । नरवालअंखिसन्ना-नच्चाविज्जंतमंतियणं ॥१५४८।। उब्भडघडदासीजण-पेलणरूसंतबहुपरि(री)वायं । विडवयणतो रचिज्जंत-कुट्टणीजणियजणहासं ||१५४९।। इय सव्वलोयलोयण-मणपरमाणंदकारच्चं तत्थ । वित्तं वद्धावणयं नरिंदगेहे महिड्डीए ॥१५५०।। विरइज्जति पहेसु कणयद्दिसमा सुवन्नरासीओ । उक्कुरुडिज्जंति तिएसु तहय मणिरयणरासीओ ॥१५५१।। दिव्वाइं भूसणाई सिंगाडपहेसु पुंजइज्जति । तह चच्चरेसु मुच्चंति विविहवत्थाण संघाया ।।१५५२।। तो(जो) जेणत्थी सो तं गहेउ सयमेव नत्थि से दोसो । इय चंपानयरीए घोसिज्जइ रायपुरिसेहिं ।।१५५३।।
Jain Education International
For Private & Personal Use Only
www.jainelibrary.org
