________________
सिरिभुयणसुंदरीकहा ॥
इय सुयजम्मपवट्टिय-महोच्छवुप्पन्नपहरिसो राया । जा अच्छइ ताव तहिं जं जायं तं निसामेह ॥१५५४।। गब्भत्थे च्चिय वीरा-हिवम्मि जे आसि वेरिराय(या)ण । नयरेसु महुप्पाया असरिससंजणियसंतासा ||१५५५।। सो पुव्व-दक्खिणावर-उत्तरराएहिं जाणिओ सव्वो । नियनियसिद्धाएसेहिं साहिओ कुमरवुत्तंतो ॥१५५६।। जह सूरसेणरायस्स कयपसाएण देवराएण । सग्गाओ चुओ देवो दिन्नो पुत्तो समुप्पन्नो ॥१५५७।। सो जइ कहवि लहेसइ अप्पाणं कम्मघम्मजोएण । तो तेण तुम्ह वंसाण मूलच्छेओ करेयव्वो ॥१५५८।। एयनिमित्ता सव्वे उप्पाया तुम्ह नयर-भवणेसु । सो बालो तुम्हाणं उवडिओ धूमकेउव्व ।।१५५९।। इय नेमित्तियवयणाई तेहिं सोऊण सव्वराईहिं । अन्नोन्नविरुद्धेहिं वि एक्कचओ(?) काउमारद्धो ॥१५६०॥ जावज्ज वि गब्भत्थो जाओ वा पावए न अप्पाणं । ताव तहिं गंतूणं जणयसमेयं वहामो तं ।।१५६१।। इय मंतिऊण सव्वे दु(दू)यमुहेहिं वि जाव वीसासा । नियनियअणंतसेणा-संमद्देहिं व संचलिया ॥१५६२।। एयं च पणिहिपुरिसेहिं तस्स सिरिसूरसेणरायस्स । पडिवक्खनरिंदाणं ववहरणं साहियं सव्वं ॥१५६३।। अणवरयपयाणएहिं धत्ता चंपं महापुरि सव्वे । संरोहं काऊण मुक्काई सकीयसेन्नाई ।।१५६४।।
Jain Education International
For Private & Personal Use Only
www.jainelibrary.org
