________________
सिरिभुयणसुंदरीकहा ॥
अइगरुयरिउकुलाई वि(?)विच्छिन्नाई जहा ममाहिंतो । तह किं मज्झ कुलस्स वि वोच्छेओ संपयं होही ? ||१४४४।। सूरसेणाओ वंसो वोच्छिन्नो दूसहं इमं वयणं । असमत्थो हं सोउं पुत्तत्थं ता जइस्सामि ।।१४४५।। इय भणिऊणं राया पसायदाणेण सुत्थिउं(यं) काउं । मंतियणं पुण पेसइ नियनियगेहेसु नीसेसं ।।१४४६।। एत्थंतरम्मि सूरो सूरस्स पयावसहमाणोव्व । बुहुइ अवरदिसोयहि-जलम्मि संतत्तसव्वंगो ।।१४४७।। सूरपयावानलकढकढंतजलनिहिविलीणरविणो व्व । संज्झामिसेण दूरब्भुयंतराओ व्व वित्थरइ ।।१४४८।। सूरोच्चिय जयइ जए अल्लियइ ससंकिओ रिऊ जस्स । अंतरियजयं पि तमं ससंकमिव जाइ वरुणदिसिं ।।१४४९ ।। कह सूरसेणभुत्ता अहिलसइ खगपि पेच्छ वरुणदिसा ? । इय इयरदिसिवहूहिं कयाइं कलुसाइं वयणाई ।।१४५०।। कसिणंधयारसलिले अदिट्ठपारे सुताररयणम्मि । तमजलहिम्मि व सयलं मज्जइ भुयणं दुरुत्तारे ।।१४५१॥ एवंविहम्मि समए राया कयसयलसंज्झकरणीओ । उवविसइ महत्थाणे बहुविहसामंतसंकिन्ने ।।१४५२।। तत्थच्छिऊण बहुगीय-वाय-पेच्छणय-नाडयाईहिं । विविहविणोएहिं तओ विसज्जए सेवयं लोयं ॥१४५३॥ वच्चइ सेज्जाहरयं विसज्जियासेसपाडुयसमूहो । ओल्लरइ महत्थरणे सुयचिंताद्धासियसरीरो ॥१४५४।।
Jain Education International
For Private & Personal Use Only
www.jainelibrary.org
