________________
१३४
सिरिभुयणसुंदरीकहा ॥
इय जा सुयलाहत्थं उवायसयजायचित्तसंकप्पो । तत्थच्छइ ता पेच्छइ जालगवक्खेण उज्जोयं ॥ १४५५ ।। तं दट्ठूण वियप्पइ किं पुव्वदिसाए एरिसुज्जोओ ? । किं नु पहाया रयणी ? अहवा चंदुग्गमो होज्ज ? || १४५६ ॥ एहि चेव निसन्नो सेज्जाए निसाए पढमदोपहरा ।
अज्ज य किण्ह चउद्दि (द्द ?) सि-दियहो कह ससहरुग्गमणं ? || १४५७।। ता किंपि महच्छरियं संभविही एत्थ जामि सयमेव । उज्जोयस्स सरूवं तत्थ गओ संपहारिस्सं ||१४५८ ॥ इय चिंतिऊण राया संवग्गियकेस- निवसण-च्छुरिओ । करसंठियकरवालो विणिग्गओ रायभवणाओ || १४५९ ॥ विविहंगरक्ख-पडियार- जामइल्लाइ सयलपरिवारं । सो वंचिऊण तुरियं विणिग्गओ चंपनयरीओ || १४६० ।। उज्जोयवसेण गओ भवणं सिरिवासुपुज्जनाहस्स । तत्थ नियच्छइ पुरओ नाणाविहदेवसंघायं ||१४६१ ।। वसुपुज्जदंसणत्थं समागओ सयलदेवपरियरिओ । सोहम्मपुराहिवई नाणाविहवरविमाणेहिं ||१४६२|| तो चिंतइ नरनाहो मन्ने एयाण चेव देवाण । विप्फुरइ एस तेओ बहुरवितेयाण अब्भहिओ || १४६३ || ता पेच्छ सुंदरमिणं संजायं जमिह आगओ अहयं । वसुपुज्जदंसणेणं सव्वं मह सुंदरं होही ||१४६४।। इय चिंतिऊण राया जा वच्चइ तुरियकयपयक्खेवो । ता माणुसो त्ति कलिउं खलिओ तियसेहिं दारम्मि || १४६५ ।।
Jain Education International
For Private & Personal Use Only
www.jainelibrary.org
