________________
सिरिभुयणसुंदरीकहा ॥ भवतरुवरुब्भवाणं पत्ताण व राय ! सव्वसत्ताणं । होही अवस्सपडणं दुप्पडियारं सुराणं पि ॥१४३३।। ता देव ! मरणधम्मीण एत्थ पाणीण मज्झगा तुब्भे । तं तु कहं जाणिज्जइ किं कल्ले अहव अज्जेव ? ||१४३४।। सूरोत्ति नियं नामं तुमए च्चिय पयडियं सचेट्टाए । निज्जियसुरासुराओ नच्चीहसे जमिह मच्चूओ ||१४३५।। ता तह किंपि अणुट्ठसु बुद्धीए परकुमेण देहेण । जह भुवणतिलयभूओ पुत्तो संपज्जए तुज्झ ॥१४३६।। इहरा उण नीसेसं नियबुद्धिपरक्कमज्जियं एयं ।। रज्जाईयमवस्सं विलुप्पिही वैरिवग्गेण ।।१४३७।। सोऊण मंतिवयणं परिणामहियं नरेसरो भणइ । को तुब्भे मोत्तूणं सव्वंगं मज्झ हियकारी ? ।।१४३८।। अणुकूलभासिणो जे तेहिं नरिंदाण होति गूढरिऊ । वयणकढोरा हियकारिणो य तुम्हारिसा विरला ।।१४३९।। ता तुम्ह वयणमेयं न अन्नहा होइ, अवितहं मंति ! । समए [प]बोहिओ हं मज्झ वि एवं मणे फुरियं ।।१४४०।। मयमंडणं व एयं अंधारे य नच्चियं व्व पडिहाइ । पुत्तं विणा असेसं रज्जं मायंदजालं व ॥१४४१।। निम्मूलो इव रुक्खो सुसियसिरासलिलसंगहो कूवो । पुत्तरहिउव्व वंसो एए न चिराउया होंति ॥१४४२।। पुत्तेण पवित्तिज्जइ पिया य माया य तह कुलं ज्जा(जा)ई । पुत्तपरिवज्जियाणं संतं पि हु सव्वमत्थमइ ।।१४४३।।
Jain Education International
For Private & Personal Use Only
www.jainelibrary.org
