________________
१३१
सिरिभुयणसुंदरीकहा ॥
सो तीए समं भुंजइ सलाहणिज्जाइं सयललोयस्स । इंदोव्व देवलोए सुहाई संतोससाराई ।।१४२२।। एकं चिय तस्स सुहं न अत्थि नीसेससुहसमिद्धस्स । जं पच्चूसे नियपुत्त-वयणअवलोयणुब्भूयं ।।१४२३।। अह अन्नदिणे राया भणिओ मंतीहिं हियनिउत्तेहिं । सव्वेहिं वि मिलिऊणं परिणामसुहावहं वयणं ।।१४२४।। इह देव ! महीवइणो सुसावहाणा वि इयरकज्जेसु । अवगयपरमत्था वि हु मुझंति पुणो सकज्जेसु ।।१४२५।। भोयण-सयण-विहूसण-गमणा-गमणाइ-सयलकिरियाओ । कहकहवि गयंदा इव चोइज्जंताणुसेवंति ।।१४२६।। एवंविहाण ताणं पयइपमाईण सव्वकज्जेसु । नीसेसकज्जकारित्तणेण किर मंतिणो हुंति ।।१४२७।। जं होइ मंतिसझं तं मंतियणो अवस्स साहेइ । जं पुण तुम्हायत्तं तं तुमए देव ! कायव्वं ॥१४२८।। उच्छाइया विवक्खा एगच्छत्ता कया वसुमई य । ठविया पयाओ सुत्थे सूरो वि जिओ पयावेण ।।१४२९।। इय एवमाइ सव्वं विप्फुरियं तुज्झ अतुलसत्तिस्स । सुविणयरज्जसमाणं मन्नाओ पुत्तपरिहीणं ।।१४३०॥ पुत्तो हि नाम नरवर ! गुणवंतो होइ सव्वसुहमूलं । पुत्तफलेणं फलिओ पुरिसो सलहिज्जइ दुमोव्व ॥१४३१॥ एसा तुह रायसिरी एसो वि य परियणो असामन्नो । एयं च धरावलयं को धरिही तुज्झ वि वरोक्खे ॥१४३२।।
Jain Education International
For Private & Personal Use Only
www.jainelibrary.org
