________________
૬૨ ] સિદ્ધસેન શતક
અંતે તો મહાવીરના ચરણે પહોંચીને સમાધાન પામવાનો. કોઈ મને દુઃખથી છૂટકારો અપાવશે” એવી આશા ઠગારી નીવડે છે, કારણ કે દુઃખ કર્મજનિત છે અને કર્મ સ્વોપાર્જિત છે. ભગવાનની આ વાત એક દિવસ માનવીને સમજાય છે અને તે દુઃખમુક્તિનો સાચો માર્ગ પામે છે. એ માર્ગ છે – પાપથી દૂર રહેવું, પુણ્યકર્મોમાં જોડાવું તે.
અને જેના હૃદયમાં આત્મવિકાસની ઝંખના જાગી છે તેવી વ્યક્તિ પણ ભગવાનની પાસે પહોંચીને સમાધાન પામશે. પરિપૂર્ણ વિકસિત ચેતના કેવી અડોલ, કેવી પવિત્ર અને કેવી આનંદધન હોય છે તેની ઝાંખી મહાવી૨માં તેને જોવા મળશે. ઈચ્છા માત્ર વિરમી ગઈ હોય એવી વીતરાગતા એ જ તો આત્મવિકાસની પરાકાષ્ઠા છે અને તે મહાવીરમાં સોળે કળાએ ખીલેલી તેને જણાશે.
શ્રી સિદ્ધસેન કહે છે કે જે ખરેખર શ્રેયની શોધમાં હશે તે ઠગાશે નહિ, ભોળવાશે નહિ. જે માત્ર દેખાવ, દલીલ કે દાવાથી દોરવાતો નથી, પણ ગુણનો ચાહક છે તે અસલની શોધ કરતો કરતો અસલ સુધી પહોંચીને જ રહે છે. ક્ષણિક સમાધાનોથી તેને સંતોષ થશે નહિ. વાસ્તવિક દુઃખમુક્તિ અને વાસ્તવિક શ્રેયપ્રાપ્તિની શોધમાં નીકળેલો મુમુક્ષુ વીતરાગ પ્રભુના ચરણોમાં મોડો વહેલો આવી પહોંચે છે.
Jain Education International
For Private & Personal Use Only
www.jainelibrary.org
