Page Text
________________
महानिसीह-सुय-खंधं
तहा चेव विणओवहाणेण महीएयव्वं, णवरं अहिन्जिणिउकामेहिं अट्ठविहं चेव णाणायारं सव्व-पयत्तेणं कालादी रक्खेज्जा, । (३) अण्णहा महया आसायणं ति । (४) अण्णं च दुवालसंगस्स सुयनाणस्स पढम-चरिमजामअहण्णिसमज्झयण-ज्झावणं, पंचमंगलस्स सोलस-ध्दजामियं च । (५) अण्णं च पंच-मंगलं कय-सामाइए इवा, अकय-सामाइए इ वा अहीए, सामाइयमाइयं तु सुयं चत्तारंभपरिग्गहे जावज्जीवं कय-सामाइए अहीज्जिणेइ, ण उ णं सारंभ-परिग्गहे अकय-सामाइए । (६) तहा पंचमंगलस्स आलावगे आलावगे आयंबिलं, तहा सक्कत्थवाइसु वि, दुवालसंगस्स पुण सुय-नाणस्स उद्देसगऽज्झयणेसु ।
[३२] (१) से भयवं ! सुदुक्करं पंच-मंगल-महासुयक्खंधस्स विणओवहाणं पण्णत्तं, महती य एसा णियंतणा, कहं बालेहिं कज्जइ ? (२) गोयमा ! जे णं केइ ण इच्छेज्जा एवं नियंतणं, अविणओवहाणेणं चेव पंचमंगलाइ सुय-णाणमहिज्जिणे अज्झावेइ वा अज्झावयमाणस्स वा अणुण्णं वा पयाइ। (३) से णं ण भवेज्जा पिय-धम्मे, ण हवेज्जा दढ-धम्मे, ण भवेज्जा भत्ती-जुए, हीलेज्जा सुत्तं, हीलेज्जा अत्थं, हीलेज्जा सुत्त-त्थ-उभए हीलेज्जा गुरुं । (४) जे णं हीलेज्जा सुत्तत्थोऽभए जाव णं गुरुं, से णं आसाएज्जा अतीताऽणागय-वट्टमाणे तित्थयरे, आसाएज्जा आयरिय-उवज्झाय-साहुणो (५) जे णं आसाएज्जा सुय-णाणमरिहंत-सिद्ध-साहू, से तस्स णं सुदीहयालमणंत-संसार-सागरमाहिंडेमाणस्स तासु तासु संकुड' वियडासु चुलसीइ-लक्ख-परिसंखाणासु सीओसिणमिस्सजोणीसु तिमिसंधयारदुग्गंधाऽमेज्झचिलीणखारमुत्तोज्झ-सिंभ पडहच्छवस-जलुल-पूय दुद्दिण-चिलिच्चिल-रुहिर-चिक्खल्ल-दुईसण-जंबाल-पंक-वीभच्छघोर-गब्भवासेसु कढ-कढ-कढेंत-चल-चल-चलस्स टल- टल-टलस्स रज्झंतसंपिंडियंगमंगस्स सुइरं नियंतणा (६) जे उण एवं विहिं फासेज्जा, नो णं मणयं पि अइयरेज्जा, जहुत्त-विहाणेणं चेव पंच-मंगल-पभिइ-सुय-नाणस्स विणओवहाणं करेज्जा । (७) से णं गोयमा ! नो हीलेज्जा सुत्तं, णो हीलेज्जा अत्थं, णो हीलेज्जा सुत्तत्थोभए । (८) से णं नो आसाएज्जा' तिकाल-भावी-तित्थकरे, णो आसाएज्जा' तिलोग-सिहरवासी विहूय-रय-मले सिद्धे, णो आसाएज्जा, आयरिय-उवज्झाय साहुणो । (९) सुट्ठयरं चेव-भवेज्जा पिय-धम्मे, दढ-धम्मे, भत्ती-जुत्ते, एगतेणं भवेज्जा सुत्तत्थाणुरंजियमाणस-सद्धा-संवेगमावण्णे । (१०) से एस णं ण लभेज्जा पुणो पुणो भव-चारगे गब्भ-वासाइयं अणेगहा जंतनं ति।
[३३] (१) णवरं गोयमा ! जे णं बाले, जाव अविण्णाय-पुण्ण-पावाणं विसेसे, ताव णं से पंच-मंगलस्स णं गोयमा ! एगंतेणं अओग्गे, । (२) ण तस्स पंचमंगल-महा-सुयक्खधं दायव्वं, न तस्स पंचमंगल-महासुयक्खं - धस्स एगमवि आलावगं दायव्वं । (३) जओ अणाइ-भवंतर-समज्जियाऽसुह-कम्म-रासि-दहणट्ठमिणं लभित्ता णं न बाले सम्ममाराहेज्जा लहुत्तं च आणेइ , ता तस्स केवलं धम्म-कहाए गोयमा ! भत्ती समुप्पाइज्जइ। (४) तओ णाऊणं पिय-धम्मं दढ-धम्म भत्ति-जुत्तं ताहे जावइयं पच्चक्खाणं निव्वाहेउं समत्थो भवति, तावइयं कारविज्जइ । (५) राइ-भोयणं च दुविह-तिविह-चउब्विहेण वा जहा-सत्तीए पच्चक्खाविज्जइ । (६) ता गोयमा! णं पणयालाए नमोक्कार-सहियाणं चउत्थं चउवीसाए पोरुसीहिं, बारसहिं पुरिमड्डेहिं, दसहिं अवड्डेहिं, तिहिं निव्वीइएहिं, चउहिं एगट्ठाणगेहिं, दोहिं आयंबिलेहिं, एगेणं सुद्धत्थायंबिलेणं । (७) अव्वावारत्ताए रोद्दट्टज्झाण-विगहा-विरहियस्स सज्झाएगग्ग-चित्तस्स गोयमा ! एगमेवाऽऽयंबिलं मास-खवणं विसेसेज्जा। (८) तओ य जावइयं तवोवहाणगं वीसमंतो करेज्जा, तावइयं अणुगणेऊणं, जाहे जाणेज्जा जहा णं एत्तियमेत्तेणं तवोवहाणेणं पंचमंगलस्स जोगीभूओ, ताहे आउत्तो पढेज्जा, ण अण्णह त्ति ।
१ संवुड आ सु. । २ आसातिज्जा खंला। ३ च जणेइ ला. ।
Jain Education International
For Private & Personal Use Only
www.jainelibrary.org
| SR No. | 001149 |
| Book Title | Agam 39 Chhed 06 Mahanishith Sutra |
| Original Sutra Author | N/A |
| Author | Punyavijay, Rupendrakumar Pagariya, Dalsukh Malvania, H C Bhayani |
| Publisher | Prakrit Granth Parishad |
| Publication Year | 1994 |
| Total Pages | 284 |
| Language | Prakrit |
| Classification | Book_Devnagari, Agam, Canon, Ethics, & agam_mahanishith |
| File Size | 19 MB |