________________
महानिसीह-सुय-खंधं 3.
[२८] अत्थेगे गोयमा! पाणी जे एवं परिबुज्झिउं । एगंत-सुह-तल्लिच्छे ण लभे सम्मग्गवत्तणिं ॥१६७।। जीवे संमग्ग-मोइण्णे घोर-वीरतवं चरे। अचयंतो इमे पंच कुज्जा सव्वं निरत्थयं ॥१६८॥ कुसीलोसण्ण-पासत्थे सच्छंदे सबले तहा। दिट्ठीए वि इमे पंच गोयमा ! न निरिक्खए॥१६९॥ सव्वण्णु-देसियं मग्गं सव्व-दुक्ख-पणासगं। साया गारव-गरुए वि' अन्नहा भणिउमुज्झए ॥१७०।। पयमक्खरं पि जो एगं सव्वण्णूहिं पवेदियं । ण रोएज्ज अण्णहा भासे, मिच्छ-दिट्ठी स निच्छियं ॥१७१।। एयं नाऊण संसग्गिं दरिसणालाव-संथवं। सवासं च हियाकंखी सव्वोवाएहिं वज्जए ।।१७२।।
[२९] 'भयवं ! निब्भट्ठ-सीलाणं दरिसणं तं पि नेच्छसि । पच्छित्तं वागरेसी य इति उभयं न जुज्जए ? ॥१७३। गोयमा! भट्ट-सीलाणं दत्तरे संसार-सागरे। धुवं तमणुकंपित्ता पायच्छित्ते पदरिसिए ॥१७४।।
भयवं ! किं पायच्छित्तेणं छिंदिज्जा नारगाउयं ? । अणुचरिऊण पच्छित्तं बहवे दुग्गइं गए ॥१७५।। गोयमा ! जे समज्जेज्जा अणंत-संसारियत्तणं । पच्छित्तेणं धुवं तं पि छिंदे, किं पुणो नरयाउयं ? ॥१७६।। पायच्छित्तस्स भुवणेत्थ नासज्झं किंचि विज्जए। बोहिलाभं पमोत्तूणं, हारियं तं न लब्भए ।।१७७॥ तं चाउकाय-परिभोगे तेउकायस्स निच्छियं । अबोहिलाभियं कम्मं बज्झए मेहुणेण य ॥१७८।। मेहुणं आउ-कायं च तेउ-कायं तहेव य । तम्हा तओ वि जत्तेणं वज्जेज्जा संजइंदिए ॥१७९।।
से भयवं ! गारत्थीणं सव्वमेवं पवत्तई। ता जइ अबोही भवेज एसु तओ सिक्खा-गुणाऽणुव्वयधरणं तु निप्फलं।१८०। गोयमा ! दुविहे पहे अक्खाए सुस्समणे य सुसावए । महव्वय-धरे पढमे, बीएऽणुव्वय-धारए ॥१८१।।
१ बुज्झिय सं. रवं. । २ साया गारवओ एते खं, साया गारव गुंफाते ला. । ३ एवं ना. रवं. ला। ४ सुस्समाणे य वं. ।
Jain Education International
For Private & Personal Use Only
www.jainelibrary.org
