________________
હવે હું બદલાઈ ગયો છું. મિથ્યાત્વી હતો, સમકિતી થયો છું. બીજા ગુણસ્થાનકે હતો, ત્રીજા-ચોથા સ્થાને પહોંચ્યો છું. દેશવિરતિધર મટી સર્વવિરતિધર થયો છું. દ્રવ્ય સાધુ હતો, ભાવ સાધુ થવા પ્રયત્ન કરું છું. છઠ્ઠા ગુણસ્થાનકે હતો - ક્રમશઃ પ્રગતિ કરનારો થઈશ. આ પ્રગતિ કેમ થઈ ? આ બધો ફેરફાર કોણે કર્યો ? આ બધું કોની કૃપા-દયાના કારણે થયું ? મારે કહેવું - માનવું પડશે. એનું કારણ - મારો સોહામણો ધર્મ
ચરમ તીર્થપતિ શ્રમણ ભગવાન મહાવીર સ્વામી પ્રરૂપીત વાણી ધર્મના વિચારોને જ્ઞાનદીપ લઈ આ સંસારમાં શોધવા નિકળ્યો. આગમરૂપી અરીસામાં નિર્મળ થઈ બારિકાઈથી નિરીક્ષણ કર્યું.
મને સમજાયું, દેખાયું, વંચાયું તે બધું સંગ્રહ કરી મારી બાલ ભાષામાં સંપાદિત કરી સમાજના જિજ્ઞાસુ વર્ગ પાસે મૂક્યું છે.
ધર્મનો મર્મ ગૂઢ છે. અઢી અક્ષરને સમજવા, જીવનમાં ઉતારવા વર્ષોના વર્ષો, જન્મોના જન્મો ઓછા પડે છે. છતાં યથાશક્તિ - મતિથી પ્રયત્ન, પુરૂષાર્થ કર્યો છે. સાગરને ગાગરમાં સમાવતાં વિચારોને મર્યાદિત રીતે રજૂ કરતાં, શબ્દથી મઢતાં શક્ય છે, કે અર્થ તત્ સ્વરૂપને પામ્યા ન હોય, અપૂર્ણ કે અયોગ્ય પૂરવાર થયાં હોય તે સર્વ ઉણપો મારી છે. '
મારામાં સ્વને શોધવા - સમજવાની જે ભૂખ જાગી છે. તેનું આ પ્રતિબિંબ છે. વાચકો - તત્ત્વબોધ પરીક્ષાના અભ્યાસીઓ આ ગ્રંથને, ગ્રંથના શબ્દોને ભાવાત્મક વાંચી જીવનમાં દાનાદિ ચારે ધર્મોને સ્થાન આપશે તેવી શ્રદ્ધા છે.
અંતે મિચ્છામી દુક્કડં.
ગુડી પડવા - ૨૦૧૫ કાલીના - માનપાડા મુંબઈ.
પ્રવર્તક મુનિ હરીશભદ્ર વિજય
