________________
Shri Mahavir Jain Aradhana Kendra
www.kobatirth.org
Acharya Shri Kailassagarsuri Gyanmandir
જગત જનની : દયા
--શ્રીમદ્ બુદ્ધિસાગરસૂરીશ્વરજી મ. સા.
સુરત તા. ૨-૨-૧૯૧૨ સર્વ જીવોને પોતાના આત્મા સમાન માનીને તેઓની રક્ષા કરવી જોઈએ. કારણ દયા સમાન કોઈ ધર્મ નથી.
પોતાના આત્મા ઉપર જેવો પ્રેમ પ્રગટે છે તેવો પ્રેમ સર્વ જીવોના ઉપર પ્રગટાવીને સર્વ જીવોના પ્રાણનું રક્ષણ કરવું. દરરોજ સર્વ જીવોના ઉપર પ્રેમ ભાવનાને પ્રગટાવવા માટે અમુક સમય નક્કી કરવો. કોઈ પણ માણસ આપણો પૂર્ણ પ્રેમી હોય તેના જેવો પ્રેમ સર્વ જીવો ઉપર પ્રગટાવવા માટે અમુક પ્રેમમૂર્તિ જેવા સર્વ જીવોને ધારી લેવા અને પશુ-પંખી તેમ જ ગરીબ, નિરાધાર માણસોના પ્રાણાદિના રક્ષણ માટે આપણી પાસે જે જે શક્તિઓ હોય તેનો સદુપયોગ કરવો.
સર્વ પ્રાણીઓના રક્ષણ માટે જે જે શક્તિઓ વાપરવામાં આવે છે તે તે શક્તિઓનો વિકાસ થયા વિના રહેતો નથી, જગતમાં દયાધર્મનું સાર્વભોમ રાજ્ય પ્રવર્તે તો આ દુનિયા ખરેખર સ્વર્ગના કરતાં પણ વધુ ઉત્તમ બની જાય. પ્રભુને મળવાનું દ્વાર દયા છે. આત્માને પરમાત્મા બનાવનાર દયા છે.
એકેન્દ્રિય જીવો પર જેઓ દયાની વૃષ્ટિને વર્ષાવી રહ્યા છે એવા સાધુઓના હૃદયમાં કોઈનું પણ મન, વચન અને કાયાથી અશુભ કરવાની લેશ પણ ઇચ્છા ક્યાંથી હોય? દયાથી પોતાના આત્માને પવિત્ર કરનારા સાધુઓની જેઓ સોબત કરે છે તેઓ દયાથી પોતાના આત્માને નિર્મળ બનાવી શકે છે.
દયાની ઉત્કૃષ્ટ દશા જાણીને સર્વ જીવોની દયા કરવામાં સદાકાળ તત્પર રહેવું.
દયાધર્મની ભૂમિકા દેઢ કરતાં બીજા પણ સગુણો પોતાની મેળે પ્રાપ્ત થવાના. જગતના જીવોની પૂજ્ય માતા દયા છે. એમ મનમાં જાણીને દયાનું આરાધન કરવા સદાય તૈયાર રહેવું.
દયા અને શુદ્ધ પ્રેમ વિના દાન પણ દઈ શકાતું નથી. જેઓનું હૃદય દયાના વિચારોથી છલોછલ ઊભરાઈ રહ્યું છે. તેઓના હૃદયમાં નિંદા, વેર, કલેશ, હિંસા, ક્રોધ, વિશ્વાસઘાત વગેરે દુર્ગુણો રહી શકતા નથી. માટે દરરોજ દયાની ભાવના ભાવવી અને પ્રાણીઓનું રક્ષણ કરવું તેમ જ તેમને અભય દાન દેવું.
જગતમાં દયાધર્મનું સાર્વ ભોમ રાજ્ય પ્રવર્તે તો આ દુનિયા ખરેખર સ્વર્ગના કરતાં પણ વધુ ઉત્તમ બની જાય.
- પાથેય’ પુસ્તકમાંથી સાભાર)
For Private And Personal Use Only
